Коронавирусийн эсрэг тэмцэлд зориулж “Global Citizen” групптэй хамтран 7 хоногийн хугацаанд 35 сая ам.долларын хандив цуглуулж чадсан нэрт дуучин Лэди Гага 4-р сарын 18-нд телевизээр томоохон тоглолтоо шууд дамжуулан хүргэх гэж байна. Түүний энэ тоглолтод Элтон Жон, Пол Маккартни, Стив Вондер, Лиззо, Билли Айлиш, Крис Мартин гэх зэрэг нэр алдартай дуучид оролцох юм.
Дэлхийн эрүүл мэндийн байгууллагатай хамтран ажиллаж байгаа дуучин Лэди Гага хандивын аянаар цугларсан мөнгийг эмнэлгийн ажилтнуудад шаардлагатай байгаа хамгаалалтын хэрэглэл, тоног төхөөрөмж болон халдварыг эмчлэх эм, вакциныг гаргаж авах ажилд зарцуулах юм байна.
“Нэг Дэлхий”, “Гэртээ хамтдаа” аяныг санаачлаад байгаа Лэди Гагагийн тоглолт АНУ-д нийт орон даяар болон Их Британид “BBC One” сувгаар мөн youtube болон зарим сошиал медиагийн платформоор шууд дамжуулагдан дэлхийн үзэгчдэд хүрэх юм.
“Нэг Дэлхий” тоглолт нь хандив цуглуулах зорилготой биш харин цар тахлын эсрэг тэмцэлд хүн төрөлхтөний эв санааны нэгдлийг харуулахад чиглэсэн гэдгийг нэрт дуучин маань онцолж байгаа юм. Тиймээс түрийвчээ далд хийж зөвхөн аз жаргалыг мэдрэн, баяр хөөрөөр дүүрэн тоглолтоо үзэхийг Лэди Гага уриалжээ.
Эх сурвалж: ВВС
