"Вагнер" хувийн цэргийн компанийн тэргүүн Евгений Пригожин өөрийн хэвлэлийн албаар дамжуулан Бахмутыг хөлсний цэргүүдэд "бүрэн эзлэгдсэн" тухай мэдээлжээ. Харин Украины Зэвсэгт хүчин түүний мэдэгдлийг үгүйсгэлээ.
Түүний хэлснээр, Украины Зэвсэгт хүчний мэдэлд байсан хотын баруун өмнөд хэсэгт байрлах сүүлчийн өндөр барилга үд дундын орчимд вагнерчуудын мэдэлд орсон байна. Пригожин сүйрсэн байшингууд ард нь харагдах Оросын далбаа, Вагнерын бэлгэ тэмдгийн хамт хөлсний цэргүүдтэй хамт зогсож буй бичлэгээ нийтэлжээ.
Вагнерын тэргүүн мөн Бахмутын төлөөх тулалдаанд ердийн армийн ангиудын тусламжгүйгээр зөвхөн хөлсний цэргүүд оролцсон гэж мэдэгджээ. Тавдугаар сарын 25-наас эхлэн Вагнерчууд амралтаа авч, давтан бэлтгэлд гарна гэж тэр нэмж хэлжээ.Тэр цаг хүртэл хотод хамгаалалтын шугам байгуулж, Бахмутыг Оросын цэргүүдэд шилжүүлнэ.
Пригожин Оросын армийн генерал Сергей Суровикинд "хүнд ажиллагаа явуулах боломж олгосон", ОХУ-ын Ерөнхийлөгч Владимир Путинд "эх орноо хамгаалах өндөр нэр төрийн төлөө" талархал илэрхийлжээ. Украины Батлан хамгаалах яам Бахмутыг эзэлснийг үгүйсгэж байна. Тус газрын дэд дарга Анна Маляр "Бахмут хотод ширүүн тулалдаан болж байна. Нөхцөл байдал хүнд байна" гэж тус өөрийн телеграм сувагтаа мэдэгджээ.
"Оросуудын бичсэн зүйлийг бид харж, сонссон - ..... Украины Зэвсэгт хүчний зарим дайчид хүртэл Бахмутыг (хотыг Оросууд эзэлсэн гэж) аль хэдийн авсан гэж ярьдаг. Одоогоор энэ бол мэдээллийн халдлага юм. "Одоогоор бид [Бахмут]-аас гараагүй байна" гэж тэр Вилне радиод өгсөн тайлбартаа хэлжээ.
Үүний зэрэгцээ Череваты Бахмут дахь нөхцөл байдал хүнд хэвээр байгааг хүлээн зөвшөөрсөн. "Бид хотыг бүслэх дахин нэг ажиллагаа явуулж байгаа бөгөөд энэ тал дээр бид ахицтай байна. Хотод маш бага газар үлдсэн тул олон хүнийг тэнд байлгахад хэцүү болсон. Тиймээс бид аюулгүй байдлын үүднээс эрт орой хэзээ нэгэн цагт тэндээс гарах нь тодорхой байна" гэж түүний хэлснийг хэвлэлүүд иш татжээ.
Эх сурвалж:Настоящее время
