Сальвадорын нийслэл Сан Сальвадор хотын хөлбөмбөгийн цэнгэлдэх хүрээлэнд шахцалдаан үүсэж 12 хүн амиа алдсан тухай албаны хүмүүс мэдэгдлээ.
Энэ хэрэг Кускатлан цэнгэлдэх хүрээлэнд орон нутгийн Алианза баг болон Санта Анагийн Фас багуудын хооронд болсон тоглолтын үеэр болжээ. Хэрэг явдлаас болж тоглолтыг түр зогсоосон байна.
Ерөнхийлөгч Наиб Букеле энэ үйл явдлыг урьд өмнө тохиолдож байгаагүй гэж нэрлээд, "бүрэн хэмжээний мөрдөн байцаалтын ажиллагаа" эхлүүлснээ зарлалаа.
Амиа алдагсдын дунд долоон эрэгтэй, хоёр эмэгтэй байсан гэж цагдаа нар мэдэгдсэн байна. Тэд бүгд 18-аас дээш насныхан байжээ.
Цэнгэлдэх хүрээлэнгийн хаалгыг хаасны дараа олон тооны хөгжөөн дэмжигчид орохыг оролдож осол болсон гэж мэдээлж байна. Зарим шүтэн бишрэгчдэд хуурамч тасалбар худалдсан гэж үзэж, шалгаж байгаа гэж мэдэгджээ. Орон нутгийн хэвлэл мэдээллийн хэрэгслээр цацагдсан бичлэгт хөгжөөн дэмжигчид цэнгэлдэх хүрээлэнгийн үүдэнд тавьсан саадыг нураахыг оролдож байгааг харуулж байна.
Албаны хүмүүсийн мэдээлснээр эрэгтэй, эмэгтэй, хүүхэд нийт 90 хохирогч гэмтэл авчээ.
Сальвадорын иргэний хамгаалалтын байгууллагын ажилтан Луис Алонсо Амаягийн хэлснээр 500 орчим хүнд эмнэлгийн тусламж үзүүлж, олонх нь эмнэлэгт хүргэгдсэн байна.
Сальвадорын хөлбөмбөгийн холбоо ням гарагт үндэсний хэмжээний бүх хөлбөмбөгийн тэмцээнийг түр зогсоожээ. Мөн тэрээр болсон явдалд харамсаж байгаагаа илэрхийлж, хохирогчдын ар гэрийнхэнд дэмжлэг үзүүлэхээ мэдэгджээ.
