АНУ-д дуудлага худалдаагаар задлаагүй 4 ГБ багтаамжтай iPhone 190,372.80 доллароор зарагджээ. Уг загвар нь тийм ч олон тоогоор гараагүй тул iPhone цуглуулагчдын сонирхлыг ихээр татсан юм.
LCG Auctions дуудлага худалдааны компаниас зохион байгуулсан дуудлага худалдаанд энэхүү iPhone утас худалдан авахаар 28 өргөдөл ирсэн бөгөөд анхны үнээс бараг 400 дахин өндөр үнээр зарагдсан байна. LCG Auctions компани iPhone-г "алдартай тансаг эд зүйл", "цуглуулагчдад маш их таалагдах зүйл" гэж тодорхойлсон байна. Дуудлага худалдааны төвийн цахим хуудсанд уг багцын тайлбар дараах байдалтай байв: “Маш ховор, үйлдвэрийн битүүмжтэй, анхны загвар 4 ГБ. Гадаргуу болон ирмэгүүд өө сэвгүй, үйлдвэрийн битүүмжлэл нь цэвэрхэн. Энэ iPhone зах зээлд гарахдаа үнэ нь 599 доллар байсан. Цуглуулагчид ховор утасны төлөө 50 мянгаас 100 мянган доллар төлнө гэж таамаглаж байсан ч үр дүн нь өмнөх бүх дээд амжилтыг эвджээ.
Энэхүү iPhone загвар нь анх 2007 онд Apple-ийг Стив Жобс удирдаж байх үед гарсан. Гэвч тус компани худалдаанд гарснаас хойш ердөө хоёр сарын дараа 4 GB багтаамжтай загвар нь хэрэглэгчдийн таашаалд нийцээгүйн улмаас үйлдвэрлэлээ зогсоосон. Ихэнх хэрэглэгчид зэрэг худалдаанд гарсан 8 ГБ багтаамжтай загварыг сонгон худалдаж авч байсан бөгөөд ердөө 100 доллар илүү төлж хоёр дахин их багтаамжтай утас авах боломжтой байжээ.
Apple-ийн ховор бүтээгдэхүүнүүд буюу Стивен Жобсын амьдрал, карьертай холбоотой дурсгалын зүйлс хэдэн сар тутамд дуудлага худалдаагаар зарагддаг. Өмнө нь хямдралд жишээлбэл, Жобсын нэг ангийнхаа сургуулийн цомогт бичсэн шүлэг, коллежийн зураг, 1978 оны нэрийн хуудас зэрэг багтсан байв. Apple компанийг үндэслэгч 56 насандаа нойр булчирхайн хорт хавдраар нас барсан юм.
Эх сурвалж: BBC
