Израил дахь дайн 10-р сарын 7-ны өглөө Газын зурвасын алан хядагчид пуужингууд харваж, Хамас бүлэглэл болон Исламын жихадын дайчид тус улсад нэвтэрч 130 гаруй хүнийг барьцаалснаар эхэлсэн юм. Хамгийн сүүлийн мэдээллээр уг халдлагын улмаас 1000 орчим израил хүн амиа алдсан байна. Үүний хариуд Израил Газын зурваст их хэмжээний агаарын цохилт өгсөөр байгаа бөгөөд удахгүй хуурай замын ажиллагаа эхлэх магадлалтай байна. Газын зурвасын нутаг дэвсгэртэй хиллэдэг газруудад зуун мянга орчим цэрэг цуглараад байна.
Өнгөрсөн бямба гарагт Хамас бүлэглэлийн дайчид Израил руу халдаж эхэлснээс хойш 1008 Израил хүн амиа алдаж, 3418 гаруй хүн шархадсан тухай АНУ дахь Израилын элчин сайдын яамнаас мэдээллээ.
Палестины амь үрэгдэгсдийн тоо 765 хүрч, 4000 гаруй хүн шархадсан гэж Газын Эрүүл мэндийн яам мэдээлсэн байна.
10-р сарын 9-ний орой Израилын Ерөнхий сайд Биньямин Нетаньяху ард түмэндээ хандан ХАМАС-ын дайчдын эсрэг дайныг ялалтаар дуусгана гэж амласан. Түүний хэлснээр Израил улс одоо оршин тогтнолынхоо төлөө дайны байдалд байна хэмээн хэлжээ. "Энэ дайныг бидэнд эмэгтэйчүүд, хүүхэд, хөгшчүүдийн амь насыг хөнөөсөн явдлыг магтан дуулдаг араатнууд тулгасан. ХАМАС-ын үйлдсэн харгислалыг Исламын улсын харгислалаас хойш хараагүй. Хүүхдүүдийг бусад гэр бүлийн гишүүдтэй нь хамт хүлж цаазалсан. Залуу охид хөвгүүдийг араас нь буудаж байсан” гэж Нетаньяху хэлжээ. Израилын Ерөнхий сайд " ХАМАС дайн хүсэж байгаа бол тэр түүнийг авах болно" гэж мэдэгджээ.
Тэрээр ХАМАС-ын зарим дайчид Израилд байсаар байгааг хэлээд "тэдэн рүү урьд өмнө хэзээ ч довтолж байгаагүй байдлаар довтлохыг" тушаажээ.
ХАМАС-ын зэвсэгт бүлэглэл энгийн иргэдэд сануулгагүйгээр Израил улс агаарын цохилт өгөх болгонд нэг барьцааны хүнийг хөнөөнө гэж сүрдүүлж байна.
ХАМАС Израил руу пуужин харвасаар байна. Израилын Газын зурваст цохилт өгсний хариуд нь Израилын Ашкелон хот руу пуужин харвасан байна. Израилын зүгээс хотын оршин суугчдыг гэрээ орхилгүй нуугдаж байхыг уриалж байна. Мөн Израилын батлан хамгаалах хүчин Тель-Авив болон Израил даяар пуужингийн довтолгооноос сэрэмжлүүлсний дохио дуугарч байгааг мэдээлсэн байна.
Эх сурвалж: BBC
