АНУ-ын тэргүүн хатагтай агсан Розалин Картерыг алсын замд нь үдэх оршуулгын арга хэмжээ Жеоржиа мужийн нийслэл Атланта хотод өнөөдөр болно. Оршуулгад түүний нөхөр Ерөнхийлөгч асан Жимми Картер болоод АНУ-ын үе үеийн тэргүүн хатагтай нар цуглах юм байна.
Эмори их сургуулийн хотхон дахь Гленн сүмд одоогийн тэргүүн хатагтай Жилл Байден болон тэргүүн хатагтай асан Хиллари Клинтон, Лаура Буш, Мишель Обама, Меланиа Трамп нар очиж тэргүүн хатагтай агсан Розалинд хүндэтгэл үзүүлэх ажээ. Түүнчлэн Ерөнхийлөгч Жо Байден, дэд Ерөнхийлөгч Камала Харрис, Ерөнхийлөгч асан Билл Клинтон нар оршуулгад оролцохоор төлөвлөж байна.
Розалин Картер энэ сарын 19-ний өдөр Жеоржиа дахь гэртээ 96 насандаа тайван нойрсжээ. Тэрээр амьдралынхаа ихэнх хугацааг хүмүүнлэгийн үйлсэд зориулсан бөгөөд 77 жилийг нөхөртэйгээ хамт өнгөрүүлжээ. Хатагтай Розалин амьдралынхаа сүүлийн жилүүдэд сэтгэцийн олдмол өвчнөөр өвчилсөн юм.
