Сэлэнгэ аймаг, Ерөө сумын Бугант багийн “Байшинт" гэдэг газар /аймгийн төвөөс зүүн урд зүгт 216 км, сумын төвөөс 108 км-т/ 8 хүн самар түүж явснаас иргэн Г нь 2023 оны 11 дүгээр сарын 09-ний өдрийн 09:40 цагийн орчим отоглосон газраас гарч яваад сураггүй болсон тул эрэн хайх ажиллагаанд дэмжлэг үзүүлэн ажиллах тухай хүсэлтийг тус аймгийн Цагдаагийн газраас 11 сарын 18-ны өдрийн 16:11 цагт хүлээн авсан. Тус аймгийн Онцгой байдлын газраас 2023.11.18-ны өдрөөс 12.03-ны өдрийг хүртэл эрэн хайх ажиллагааг зохион байгуулж, цаг агаарын нөхцөл байдлын улмаас түр зогсоосон. Мандал сумын Засаг даргын 2024.05.06-ны өдрийн А/141 дүгээр захирамжийн дагуу эрэн хайх ажиллагааг тавдугаар сарын 06-ны өдрийн 17:50 цагаас дахин эхлүүлсэн. Тус аймгийн Онцгой байдлын газрын Мандал сум дахь Онцгой байдлын хэлтсийн Гал түймэр унтраах, аврах 19 дүгээр ангийн алба хаагчид, сум дундын Цагдаагийн хэлтсийн алба хаагчид, Байгаль хамгаалагч, ар гэрийнхэн, орон нутгийн иргэдтэй хамтран иргэн Г/33 настай, эрэгтэй/-ийг эрэн хайх ажиллагааг тавдугаар сарын 09-ний өдрийн 09:15 цагт дахин эхлүүлж "Хатант" голоос /урд зүгт 15 км/ явганаар, мөн байрлаж байсан отог “Байшинт” гэдэг газарт очиж 2 хэсэгт хуваагдан зохион байгуулсан боловч үр дүнд хүрээгүй тул 19:30 цагт түр зогсоосон. Эрлийг тавдугаар сарын 10-ны өдрийн 09:00 цагт дахин эхлүүллээ.
