Архангай аймгийн Батцэнгэл сумын Дэл багийн “Урд нуруу” гэдэг газар /аймгийн төвөөс зүүн зүгт 70 км-т, сумын төвөөс баруун зүгт 10 км-т/ 7 сарын 22-ны өдрийн 07:00 цагийн орчим түр зуурын усархаг бороо орсны улмаас 3 өрхийн 3 гэр /9 хүн/ усанд автсан тухай дуудлагыг мөн өдрийн 09:40 цагт аймгийн Онцгой байдлын газрын Эрэн хайх, аврах салбарын алба хаагчид хүлээн авч ажиллан, 3 өрхийн 8 хүн /5 том хүн, 3 хүүхэд/, 3 гэрийг аюулгүй газарт нүүлгэн шилжүүлсэн.

Өвөрхангай аймгийн Хархорин сумын Эрдэнэ толгой багийн “Сайр” гэдэг газар /аймгийн төвөөс зүүн хойд зүгт 138 км-т, сумын төвөөс баруун хойд зүгт 2.5 км-т/ 7 сарын 21-ний өдөр орсон усархаг борооны улмаас 5 өрхийн 1 байшин, 4 гэр усанд автсан тухай дуудлагыг 7 сарын 22-ны өдрийн 10:55 цагт аймгийн Онцгой байдлын газрын Хархорин сум дахь Онцгой байдлын хэлтсийн Гал түймэр унтраах, аврах 45 дугаар ангийн алба хаагчид хүлээн авч Хархорин “АЗЗА” ТӨХК-ийн ажилтнуудтай хамтран 5 өрхийн нийт 45 хүн /том хүн 28, хүүхэд 17/, 4 гэрийг эд хогшлын хамт аюулгүй газарт нүүлгэн шилжүүлсэн.

Өвөрхангай аймгийн Бат-Өлзий сумын Улаан-Ам багийн “Улаан-Ам” гэдэг газар /аймгийн төвөөс хойд зүгт 170 км-т, сумын төвөөс баруун зүгт 35 км-т/ 7 сарын 21-ний өдөр Бат-Өлзий сумын нутгаар орсон усархаг бороо орсны улмаас тус сумын Улаан-Ам багийн Улаан-Ам гэдэг газарт 6 айлын гэр, мөн Өвт багийн “Өвт” гэдэг газар 12 айлын гэр, 30 байшин, 42 хашаа үерийн усанд автсан тухай мэдээллийг 7 сарын 22-ны өдрийн 12:10 цагт Нутгийн захиргааны байгууллагын ажилтнууд хүлээн аван ажиллаж, нийт 48 өрхийн 60 хүн /24 том хүн, 36 хүүхэд/, 18 гэрийг аюулгүй газарт нүүлгэн шилжүүлж, үерийн усанд эвдэрсэн “Орхон” голын гүүрийг сэргээн засварласан тухай мэдээллийг тус сумын Байгаль орчны байцаагч аймгийн Онцгой байдлын газарт мэдэгдсэн байна. 

Эх сурвалж: ОБЕГ