“Намрын ногоон өдрүүд-Үндэсний үйлдвэрлэл 2021” нэгдсэн арга хэмжээ Төв цэнгэлдэх хүрээлэнд өнөөдөр 3 дахь өдрөө үргэлжилж байна. 

Монгол Улсын Ерөнхий сайдын хамт өнөөдөр “Намрын ногоон өдрүүд” үзэсгэлэн худалдаанд оролцож, тариаланчид, ногоочид, жижиг дунд үйлдвэрлэл эрхлэгчид, салбарын хөгжилд шинэ технологи, үйлдвэрлэл нэвтрүүлсэн эрдэмтэн судлаачдын бүтээгдэхүүнтэй танилцан, тэдний санал бодлыг сонслоо. 

Цар тахлын нөхцөл байдалдтай уялдуулан гар ариутгагч, Монголын уламжлалт Мана 4, Норов 7 тан үйлдвэрлэн хэрэглэгчдэд нийлүүлж буй Одь-тан компанийн хувьд Жижиг, дунд үйлдвэрийн газраас зээл авч 20 ажлын байр бий болгосон байна. Мөн ажлын байрыг дэмжих 2 наядын зээлийг эдийн засаг хүндрэлтэй байгаа энэ цаг үед олгосон нь том дэмжлэг болсныг үйлдвэрлэгчид хэлж байв. 

Манай хүнсний ногоочид Азийн хөгжлийн банкны буцалтгүй тусламжийн хүрээнд хэрэгжүүлж байгаа төсөлд хамрагдан хоршоо хэлбэрээр ажиллаж, энэ жил хураан авсан ургацаа нийслэлчүүддээ борлуулж байна. Монгол ногоо төслийн хүрээнд саримс, байцаа, сонгины тариалалт нэмэгдсэн, түүнээс гадна энэ хавар ногоочиддоо үрийн үнийг 80 хувь хөнгөлөн олгосон нь чухал дэмжлэг болж чаджээ. 

Энэ жилийн хувьд төмсийг 100 хувь, хүнсний ногооны 60 хувийг бид дотооддоосоо хангана. Харин илүүдэл ногоог үйлдвэрлэлд ашиглаж байх зорилгоор Төв аймагт цардуулын үйлдвэр барихаар ажиллаж байна. 

Ногоочдод хамгийн тулгамддаг асуудал бол зоорь сав байдаг. Тиймээс тариалангийн бүс нутагт Польшийн хөнгөлөлттэй зээлээр зоорь барих ажлыг зохион байгуулж байгаа юм. 

Хонины нэхийгээр гутал хүрэм үйлдвэрлэж байгаа компанийн зүгээс зөөлөн үстэй Орхон хонийг олноор нь үржүүлэхэд анхаарсан бодлого хэрэгтэй байгааг хэлж байлаа. 

Намрын ногоон өдрүүд үзэсгэлэн худалдаанд нийт 310 гаруй аж ахуйн нэгж, 140 орчим иргэн оролцож 7 өдрийн турш өөрсдийн бүтээгдэхүүнээ үнэ төлбөргүй сурталчлан борлуулж байгаадаа сэтгэл хангалуун байна. Мөн хэрэглэгчийн сэтгэл ханамжийн судалгааны мэдээллээр худалдан авалт хийж буй иргэдийн сэтгэл ханамж 70 хувийн үзүүлэлттэй, зохион байгуулалт, халдвар хамгааллын талаар сэтгэгдэл өндөр байгаа юм. 

Тоон дүнгээс харвал 9-р сарын 16-нд 24.5 сая, 17-нд 79 сая, 18-нд 111 сая гээд 3 өдрийн турш нийтдээ 214,5 сая төгрөгийн борлуулалт хийжээ. 

Ерөнхий сайдын зүгээс эрүүл мэндээ хамгаалахын зэрэгцээ эдийн засгаа сэргээхэд Засгийн газар болон иргэдийн хамтын ажиллагаа чухал учраас хамтдаа хичээхийг уриалсан юм.