Нийслэлийн Засаг дарга бөгөөд Улаанбаатар хотын Захирагч Д.Сумъяабазар Хан-Уул дүүргийн 11, 17 дугаар хорооны нутаг дэвсгэрт орших “Ривер гарден”, “Хан хиллс” хотхоныг хоёр гарцтай болгох үүргийг холбогдох албаныханд өгсөн. Үүний дагуу Нийслэлийн Засаг даргын 2020 оны А/414 дүгээр захирамжаар батлагдсан улсын төсвийн хөрөнгөөр хэрэгжүүлж буй “Ривер хиллс хотхоноос Зайсангийн гудамж хүртэлх 0.9км урттай авто зам”-ын байгууламжийн ГБМЗХ2020/16-020 дугаартай авто зам, замын байгууламж төлөвлөх даалгавар баталсан байна. Батлагдсан авто зам, замын байгууламж төлөвлөх даалгаврын хүрээнд загвар зураг боловсруулах шатанд үерийн далангийн аюулгүй байдал, Цахилгааны 35кВт-ын агаарын шугам түүний хамгаалалтын зурвасаас хамааран трассын зурагт өөрчлөлт оруулсан байна. Тус трассын зураг төслийн боловсруулалт, суурин судалгааг хийхэд 11 нэгж талбарын 7476 м2 /0,75га/ талбай өртөж Нийслэлийн Засаг даргын А/406, А/407,  А/408,  А/409, А/410, А/414, А/415, А/416, А/417, А/420, А/421 тоот захирамжуудаар газар эзэмших эрхийн гэрчилгээг хүчингүй болгож шийдвэрлэсэн. Тус газарт Наймдугаар сарын 15-наас эхэлсэн зам барилгын ажил 40 хувьтай үргэлжилж байна.