Хэнтий аймгийн Баянмөнх сум Баянбулаг багийн “Эрэгмэг" гэдэг газар /аймгийн төвөөс баруун урд зүгт 140 км-т, сумын төвөөс урд зүгт 40 км-т, Бор-Өндөр сумаас зүүн хойд зүгт 50 км-т/ “Хөтөл-Ус" нууранд 2 зорчигчтой суудлын автомашин суусан, жолооч нь эсэн мэнд гарч, зорчигч нь автомашин дотроо үлдсэн тухай дуудлагыг 10 сарын 28-ны өдрийн 05:53 цагт хүлээн авсан.

10 сарын 31-ний өдрийн байдлаар тус аймгийн Онцгой байдлын газрын Эрэн хайх, аврах салбар, Бор-Өндөр сум дахь Гал түймэр унтраах, аврах 49 дүгээр анги, Цагдаагийн хэлтсийн алба хаагчид, Баянмөнх сумын Засаг даргын Тамгын газрын ажилтнууд  иргэн Б/40 настай, эрэгтэй/-ийг  эрэн хайх ажиллагааг 2 бүлэгт хуваагдан зохион байгууллаа. 1 дүгээр бүлэг “Хөтөл-Ус" нуурын усанд завиар урсаж, 2 дугаар бүлэг “Хөтөл-Ус” нуурын эрэг дагуу болон болон нуураас зүүн зүгт “Эргэнэг хайрхан”, “Язаар-Уул" гэдэг газар хүртэл 20 км-т явганаар болон автомашинтайгаар эрэн хайх ажиллагааг зохион байгуулж үр дүнд хүрээгүй тул мөн өдрийн 19:00 цагт түр зогсоосон. Мөн “Хөтөл-Ус" нуурын усны түвшинг багасгах зорилгоор экскаватороор нуурын хойд эргийг сэтэлж усыг урсгах ажлыг зохион байгуулснаар усны түвшин 20 см-ээр багассан. 11 сарын 01-ний өдрийн 07:00 цагт эрэн хайх ажиллагааг эхлүүлсэн.  "Хөтөл-Ус" нуурын урт 500 м, өргөн 300 м, гүн 2 м орчим хэмжээтэй байна.