Нийслэлийн эрүүл мэндийн байгууллагын 2021 оны шилдэг байгууллага, эмч мэргэжилтэнд шагнал гардуулах уламжлал болсон хүндэтгэлийн ёслолыг Хангарьд ордноо өчигдөр зохион байгууллаа.
Энэ үеэр Нийслэлийн Засаг дарга бөгөөд Улаанбаатар хотын захирагчийн 2021 оны А/1006 дугаар захирамжийн дагуу нийслэлийн эрүүл мэндийн шилдэг 12 байгууллага, 187 эмч, эмнэлгийн мэргэжилтэн, ажилтан, албан хаагчдад 400 сая орчим төгрөгийн мөнгөн урамшууллыг олгов.
Нийслэлийн Эрүүл мэндийн газрын харьяа эрүүл мэндийн байгууллагуудад ажиллаж буй эрүүл мэндийн ажилтнуудын нийгмийн баталгааг хангах, тогтвор суурьшилтай ажиллах нөхцөлийг бүрдүүлэн, тэдний мэргэжлийн ур чадварыг дээшлүүлэх, хариуцлагыг нэмэгдүүлэх замаар иргэдэд үзүүлэх тусламж, үйлчилгээний чанар, хүртээмжийг дээшлүүлэх зорилгоор нийслэлийн төсвөөс жил бүр “Эрүүл мэндийн байгууллагын ажлын үр дүнгээр тооцон сайжруулах арга хэмжээний зардал”-ыг батлан ажил үйлсээрээ тэргүүлсэн эрүүл мэндийн байгууллага, эмч, эмнэлгийн мэргэжилтэн, ажилтанг урамшуулж ирсэн билээ.
Нийслэлийн Засаг даргын Хүний хөгжил, нийгмийн бодлогын асуудал хариуцсан орлогч З.Төмөртөмөө ёслолыг нээж хэлсэн үгэндээ, коронавируст халдварын цар тахлын энэ хүнд үед өргөсөн тангарагтаа үнэнч байж нийслэлийн хүн амын эрүүл энхийн манаанд сэтгэл, зүтгэлээ зориулан ажиллаж байгаа нийт эрүүл мэндийн байгууллагын эмч, мэргэжилтэн, ажилтан, албан хаагч нарт чин сэтгэлийн талархал илэрхийлээд цаашид цар тахлыг бүрэн дарахад нийслэлээс бүх талаар дэмжиж ажиллах болно гэдгээ илэрхийллээ.
Мөн НЗДТГ-ын Нийгмийн бодлогын хэлтсийн дарга И.Баатархүү хүрэлцэн ирсэн эрүүл мэндийн байгууллагын албан хаагчдад хандаж, “Иргэд чөлөөтэй гадуур зорчиж, үзвэр үйлчилгээ, спорт, урлагийн үйл ажиллагаа нээгдсэн. Энэ нь та бүгдийн ач гавьяа, та бүхний хөдөлмөр хөлсийн үр дүн юм шүү” хэмээн цохон тэмдэглээд, “Цар тахлын хажуугаар үндсэн тусламж, үйлчилгээг алдуулахгүй, өмнөх үеийн үзүүлэлтийг ахиулан ажиллаж байгаа нь та бүхний ур чадвар, мэргэжлийн чадавх, ажлыг хийж бүтээх эрч хүч дүүрэн байгааг илтгэж байна. Нийслэлийн харьяа байгууллагын 7000 гаруй эмч, алба хаагчдыг төлөөлөн та бүхнийг шагнаж байгаа юм шүү” хэмээгээд ажлын амжилт хүслээ.
Энэ жилийн шилдэг байгууллагаар Баянгол дүүргийн Эрүүл мэндийн төв, Хан-Уул дүүргийн Эрүүл мэндийн төв, Багануур дүүргийн Эрүүл мэндийн төв, Сүхбаатар дүүргийн нэгдсэн эмнэлэг, Баянзүрх дүүргийн Нэгдсэн эмнэлэг, Сонгинохайрхан дүүргийн Эрүүл мэндийн төв шалгарсан бол шилдэг өрх, тосгоны эрүүл мэндийн төвөөр Налайх дүүргийн “Нарны эрч” ӨЭМТ, Сүхбаатар дүүргийн “Конвер” ӨЭМТ, Баянгол дүүргийн “Амин жаргалан” ӨЭМТ, Хан-Уул дүүргийн “Хашчагнуур” ӨЭМТ, Сонгинохайрхан дүүргийн “Энхийн өргөө” ӨЭМТ, Сонгинохайрхан дүүргийн “Баянбигэр” ӨЭМТ шалгарч өргөмжлөл, мөнгөн шагналаар шагнагдав.
Мөн нийслэлийн эрүүл мэндийн байгууллагуудаас 70 эмч, 69 сувилагч, тусгай мэргэжилтэн, 48 бусад албан хаагч гээд нийт 187 ажилтныг шилдгээр тодруулан мөнгөн урамшуулал олгосон ба тэдний төлөөлөл болж есөн албан хаагчид хүрэлцэн ирж шагналаа гардан авсан юм.
2013 оноос эхлэн олгож байгаа энэхүү урамшууллыг давхардсан тоогоор 1100 гаруй эрүүл мэндийн ажилтан, 60 орчим байгууллага авсан ба нийтдээ нийслэлийн төсвөөс 3 тэрбум орчим төгрөг зарцуулсан байна.
