Бага насны буюу 8 настай Э, 12 настай Б нар нь бүлэглэн бусдын орон байранд нэвтэрч эд хөрөнгийг нь хулгайлах явцдаа эд хөрөнгийг устгасан гэмт хэрэгт холбогдсон, Баянхонгор аймгийн Прокурорын газраас Э, Б нарт яллах дүгнэлт үйлдэн хэргийг шүүхэд шилжүүлжээ.
Анхан шатны шүүх хэргийг шүүх хуралдаанаар хянан хэлэлцээд бага насны Э, Б нарыг бусдын эд хөрөнгийг хүч хэрэглэхгүйгээр нууцаар хууль бусаар, хүн байнга амьдрах орон байранд нэвтэрч үйлдсэн, бусдын эд хөрөнгийг хууль бусаар устгасан, гэмтээсэн гэмт хэргийг тус тус үйлдсэн гэм буруутайд тус тус тооцож, гэмт хэрэг үйлдэх үедээ 8 настай байсан Э-г эрүүгийн хариуцлагаас чөлөөлж, 12 настай байсан Б-д Эрүүгийн хариуцлага хүлээлгэж, хуульд заасан ял оногдуулж, гэмт хэргийг улмаас учруулсан гэм хорын хохирлыг хууль ёсны төлөөлөгч, асран хамгаалагч нараас нь гаргуулж шийдвэрлэжээ.
Давж заалдах шатны шүүх хэргийг бүхэлд нь хянаад гэмт хэрэгт холбогдсон бага насны хүүхдүүд нь сэтгэхүйн хувьд гэмт хэргийг хүсэж, мэдэж хийх боломжгүй тул гэмт үйлдэлд тооцохгүйгээс гадна Эрүүгийн хуульд эрүүгийн хариуцлага хүлээлгэх насыг 16 нас, 12 төрлийн хүнд гэмт хэрэгт 14-16 нас гэж хязгаар тогтоон хуульчилсан.
Мөн түүнчлэн яллах дүгнэлт болон анхан шатны шүүхийн шийтгэх тогтоолд бага насны хүүхдүүдийн өөрсдийнх өгсөн мэдүүлгүүдийг нотлох баримтад авч үнэлж Эрүүгийн хариуцлага хүлээлгэсэн нь гэмт хэрэгт холбогдсон хүний өөрөө өөрийнхөө эсрэг мэдүүлэг өгөхгүй байх Үндсэн хуулиар хамгаалагдсан эрхийг ноцтой зөрчсөнөөс гадна тэдний мэдүүлгүүдээс өөрөөр гэмт хэрэг үйлдсэн болохыг нь нотолсон, нотлох баримт хавтаст хэрэгт авагдаагүй тул " гэмт хэргийн шинжгүй” үндэслэлээр хэргийг болон иргэний нэхэмжлэлүүдийг тус тус хэрэгсэхгүй болгож, хүүхдүүдийг цагаатгаж, хэргийг хэрэг бүртгэлтэд буцаан шийдвэрлэснийг Монгол Улсын Дээд шүүхийн Эрүүгийн хэргийн танхимын нийт шүүгчийн 2023 оны 1 дүгээр сарын 18-ны өдрийн 82 дугаар тогтоолоор хэвээр үлдээж шийдвэрлэснээр эцсийн шийдвэр болжээ.
- Анхан шатны шүүхийн 2022.09.26-ны өдрийн 179 дугаар шийтгэх тогтоол
- Монгол Улсын Дээд шүүхийн Эрүүгийн хэргийн танхимын нийт шүүгчийн 2023 оны 1 дүгээр сарын 18-ны өдрийн 82 дугаар тогтоол
Шүүхийн шийдвэрүүдийг бүрэн эхээр нь үзэж болох цахим холбоос: ЭНД дарж үзнэ үү.
Тоймыг бэлтгэсэн: Баянхонгор аймгийн Эрүү, Иргэний хэргийн давж заалдах шатны шүүхийн Ерөнхий шүүгч: Б.Болор-Эрдэнэ
