Цаг үеийн мэдээ

УИХ- ийн гишүүн Х.Булгантуяагийн санаачилгаар хэрэгжиж буй хүүхэд хамгааллын “ШҮГЭЛ” төслийн нээлт өнөөдөр  “Millennium plaza”  зочид буудалд боллоо. 

Энэхүү төсөл нь НҮБ-ын Хүүхдийн сангийн дэмжлэгтэйгээр нийслэлийн Баянзүрх дүүргээс эхлэн орон даяар хэрэгжих ба дараах зорилготой юм. Үүнд: 

Хүүхдийн эсрэг аливаа дарамт, хүчирхийлэл, гэнэтийн осол, гэмтэл, эрсдэлээс хүүхэд өөрийгөө хамгаалах, эрсдэлт нөхцөл байдлыг даван туулахад хүүхэд хамгааллын  ШҮГЭЛ-ийн хэрэглээг аж байдалдаа нэвтрүүлэн хэрэглэж дадах, зан үйл болгон төлөвшүүлэхийг  эцэг, эх, асран хамгаалагч нар олон нийтэд уриалах, 

Шүглийн дуут дохиог сонссон даруйд хүүхдэд шаардлагатай тусламжийг яаралтай  үзүүлэхэд олон нийтийн хандлагыг нийгмийн бүхий л орчинд бүрдүүлэх, 

Яаралтай тусламж хэрэгтэй хүүхдийг холбогдох чиг үүргийн байгууллагуудад мэдэгдэж хариу арга хэмжээ авах зорилготой.  

Ингэхдээ бүх Ерөнхий боловсролын сургуулиудаар дамжуулан 3-8 дугаар ангийн сурагчид болон эцэг эх, асран хамгаалагч нарт ШҮГЭЛ-ийн хэрэглээ, зорилго, ач холбогдол, үр нөлөөг сурталчлан зохион байгуулна. 

Цагдаагийн Ерөнхий Газрын ирүүлсэн “Хүүхэд хохирсон гэмт хэргийн сүүлийн 5 жилийн статистик мэдээлэл”-ээс харахад тухайн төрлийн гэмт хэргийн үзүүлэлт дорвитой буураагүй ба 2020 онд 1118, 2021 онд 1365, 2022 оны 9 сарын байдлаар 1462 хүүхэд гэмт хэргийн хохирогч болон бүртгэгджээ. 

Улсын хэмжээнд 2021 оны байдлаар 0-18 насны 42,000 гаруй хүүхэд осол гэмтэлд орж Гэмтэл Согог судлалын Үндэсний төвд ирснээс зам тээврийн осол 2,674, түлэгдэлт 2,589, унаж бэртсэн 20,750 хүүхэд байна. 

Хүчирхийллийн эсрэг хүүхэд, эмэгтэйчүүдэд зориулсан бие хамгаалах тулааны урлаг, нүдний шүршигч, өөрийгөө хамгаалах хэрэгсэл, зэвсгүүд гэх мэт янз бүрийн хувилбарууд байдаг ч ШҮГЭЛ үлээх арга нь өөрийгөө хамгаалж чадахгүй нөхцөлд дуу авиа гаргах, халдагчийг цочроох, айлгах, бусдад чимээ дохио өгөх, анхаарал татах зэрэг олон давуу талтай тул хүүхдэд хамгийн их тохирох шийдэл  хэмээн олон улсад үздэг. 

Шүглийн давуу тал нь хохирогчийн эсрэг ашиглагдах боломжгүй, хэрхэн ашиглах талаар сурахад их цаг зарцуулах шаардлагагүй, аль ч насны хүн хэрэглэх боломжтой, үнийн хувьд боломжийн өртөгтэй байдаг байна. Мөн ШҮГЭЛ-ийн давуу тал нь дуут дохиог сонссон хүн бүрд хүчирхийллийг таслан зогсоогч байх боломжийг олгож байгаа явдал юм.