Кыргызстаны нийслэл Бишкект зургаадугаар сарын 1-4-ны өдрүүдэд бөхийн төрлүүдийн дэлхийн чансааны оноо олгох тэмцээнд боллоо. Тэмцээний сүүлийн барилдааныг 92 кг-ын жинд "U23" насны ДАШТ-ий хүрэл, насанд хүрэгчдийн Азийн аваргын хошой хүрэл медальт ОУХМ Ганбаатарын Ганхуяг хийж мөнгөн медаль хүртэв. Тэрбээр үдээс өмнө нь шөвгийн наймд Казахстаны Абдиманап Байгенжеевийг 7:1-ээр, хагас шигшээд БНХАУ-ын Жумабай Аергенийг 5:2-оор тус тус ялсан ч алтан медалийн төлөөх барилдаанд "Белград-2022" ДАШТ-ий хүрэл медальт Гүржийн Мириани Майсуразед 1:6-гаар ялагдаж үзүүрлэсэн.
Ийнхүү Монголын бөхчүүд Бишкекийн дэвжээнээс 2 алт, 4 мөнгө, 2 хүрэл, нийт 8 медаль хүртэв.
