2023-2024 оны хичээлийн жилд төрийн өмчийн ЕБС-ийн 5, 6 дугаар ангид “Pearson English” англи хэлний сургалтын цогц хөтөлбөр хэрэгжинэ. Үүнтэй холбогдуулан үндэсний сургагч багш бэлтгэх, багш нарт арга зүйн дэмжлэг үзүүлэх сургалт өнөөдөр эхэллээ.
- Сургалт 2023 оны 08 дугаар сарын 27-ны өдрийг хүртэл үргэлжлэх бөгөөд Английн Pearson байгууллагын олон улсын сургагч багш Филип Ворвик удирдан явуулж байна. “Pearson English” англи хэлний сургалтад аймаг, сум, дүүргийн 5, 6 дугаар ангид англи хэлний хичээл заах 120 багш хамрагдаж байна.
- Тус хөтөлбөр нь дижитал платформ болон танхимын сургалтын хосолсон хэлбэрийг сургалтын арга барилдаа ашигладаг. Иймд төрийн өмчийн ЕБС-ийн англи хэлний багш нарт “Pearson English Connect” дижитал платформыг ашиглан хичээлээ хэрхэн заах, цахим анги үүсгэж, сурагчийн сурлагын ахицыг хянах, түүнд тохирсон даалгавар хэрхэн өгөх зэрэг зааварчилгааг энэхүү сургалтаар өгөх юм. Түүнчлэн багш нар заах арга зүйг хөгжүүлэх, сайжруулахад чиглэсэн практик хичээлүүдийг судална.
- “Pearson English Connect” дижитал платформ нь хамгийн сүүлийн үеийн технологийг ашигласан, хиймэл оюун ухаанд суурилсан багш, сурагчдад зориулсан бүрэн интерактив хэрэглэгдэхүүнтэй. Энэхүү платформд багшид зориулан боловсруулсан суралцахуйн зорилт бүхий гарын авлага, хичээлийн төлөвлөгөө, үнэлгээний цогц багц, онлайн анги, дүрмийн хичээл, интерактив сурах бичгийг ашиглах видео заавар, тест зохиогч, дүнгийн систем /сурагч бүрээр/, зайнаас заах гарын авлага, тусламж, заавар зэрэг хэрэглэгдэхүүнтэй.
- Өөрөөр хэлбэл, багш дижитал платформоо ашиглан хичээлээ удирдан явуулна, харин сурагчид багшийг дагаан хэвлэмэл сурах бичигтэйгээ зэрэг ажиллаад явах боломжтой юм.
- Сургалтыг удирдаж буй багш Филип Ворвикийн хувьд Жоржиагийн Улсын их сургуулийн англи хэлний тэнхимийн эрхлэгч, “Pearson”, “Cambridge” байгууллагын олон улсын англи хэлний шалгалтын ярианы ур чадварын шалгагч багш бөгөөд “Pearson” байгууллагын англи хэлний хөтөлбөр, сурах бичгийн заах арга зүй, сургалтын менежмент, багшийн сургалт, хөгжлийн чиглэлээр 30 гаруй жил ажиллаж буй туршлагатай. Мөн тэрээр Монгол Улсад 2023 оны 03 дугаар сард хүрэлцэн ирж, “Pearson English” хөтөлбөр туршилтаар хэрэгжсэн 38 сургуулийн англи хэлний багш нарт сургалт зохион байгуулсан юм.
