Сэгс цагаан богд хэмээх олонд алдартай найраглалын оноосон нэрийг ашиглан гуйвуулж, өөрийгөө Сексцагаанбогд гэж нэрлэсэн Гантулга гэдэг залуугийн овилгогүй үйлдлийг олон түмэн буруушаалаа. Ердийн нэг залуу согтуураад байгаа юм биш Ерөнхий сайдын зөвлөх шогтоод байгаа учраас олон түмэн бухимдлаа.
Уран үгийн мастер Дэндэвийн Пүрэвдоржийн амрагтаа бичсэн захидал хэлбэрээр шүлэглэсэн бүтээлийг мушгин ашигласан, муутган гуйвуулсан залуу амраг охиноо алгадаж агсарлаа. Уул усны ариун нэрийн сэгсийг нь секс болгож бохирлоод, өөрийгөө цагаан богдоор өргөмжилсөн үнэн авир нь илэрлээ. Уул усны нэр гуйвуулдаг хүн уусан архиндаа өөрөө гуйвлаа, Урин гэдэг найз охиноо унатал алгадаж агсарлаа.
Баянхонгор аймгийн Шинжинст суманд ангир янгир дүүлсэн, алтан шаргал говьд Сэгсцагаанбогд хэмээх сэтгэл сэргээсэн ариун дагшин нутаг бий. Улсын нийслэл Улаанбаатар, төрийн ордонд Сексцагаан богд нэр хочтой ч агсам догшин залуу бий. Баянхонгор аймгийн Шинэжинст суман дахь уул усны алдар нэрийг гуйвуулсан, баян нэгэн хонгор шинэ жинс, өндөр отго өмссөн байна.
Уучлал гуйгаад байгаа юм шиг боловч зодолддог хос биш хэрэлддэг хос, түлхүүрээ мартсан байж, үүр шөнөөр согтуу хөлчүү ганцаараа харих гэлээ гэж найз охиноо алгадсан тухайгаа хөхиүн инээдээр чимээд хээв нэг хүүрнэх ажээ. Түлхүүрээ мартсан найз охиноо гадаа хонох, хүчиндүүлж хохирохоос айсан юм бол надтай уугаад үлд гэж алгадаж унагах биш чамтай хамт явъя гэж тэврээд алхах байсан юм шүү дээ, Гантулга зөвлөх өө.
Ингэхэд Засгийн газрын тэргүүнд залуучуудын талаар юу зөвлөдөг залуу вэ? Зөвлөх бус зөвлүүлэх хэрэгтэй хүн байна. Залуучуудын дундах архидан согтууралт, стресс бухимдал, зодоон хүчирхийлэл, гэмт хэрэг, гэр бүл салалт, биеэ зөв авч явах асуудлаар ямар суут санаа, мэргэн арга хэлж зөвлөж чадах вэ? Төрөө засаад, гэрээ зас, гэрээ засаад биеэ зас гэдэг бил үү?
Эцэст нь өөрт чинь жинхэнэ Сэгс цагаан богд нутгаас нэгэн мэйл ирснийг эрхэм зөвлөхөд уламжилъя.
Сайхан хотын
Хөлчүү хархүү
Сайн байна уу?
Сэтгэлд гэгээ татуулсан
Сэгс цагаан богдын алдрыг минь
Сэглэж бүү гуйвуулаач
Сундлан нүүх үүлс шиг
Суварган цэнхэр уулсын алдрыг
Сувдаглан бүү ашиглаач
Цэнгүүн сайхан үдэш
Цэнхэр савтайд хөлчүүрэлгүй
Сайхан бие эрүүл (
Санаа сэтгэл саруул
Бие биеэ хайрлан суувал
Бидэн бүгдийн жаргал бус уу)
Ай даа, сайхан говийг минь
Алтан шаргал говийг минь
Нэр нь хүртэл шүлэг
Нээрэн сайхан нутгийн минь
Нэрийг нь бүү гуйвуулаач
Гаа
2024-09-10
Энэ яадаг яацан залуу вэ?