Я.Содбаатар: МАН-ын бага хурлын долдугаар хуралдаан амжилттай хуралдаж дууслаа. МАН-ын бага хурлын энэхүү хуралдаанаар МУ-ын Үндсэн хууль, МАН-ын дүрэмд заасны дагуу МУ-ын Ерөнхий сайдад нэр дэвшигчийг тодруулж, томилуулах  саналыг хэлэлцлээ. Мөн бусад асуудлыг ч хэлэлцлээ. МАН-ын бага хурлын энэ удаагийн хуралдаанаар шинэ ЕС-д нэр дэвших 4 нэр дэвшигчийн асуудал яригдсан. Өглөө МАН-ын УЗ хуралдаж, МАН-ын дарга Л.Оюун-Эрдэнийн санал болгосны дагуу намын УЗ-өөр Г.Занданшатарыг 100 хувийн саналаар намын бага хуралд ЕС-д нэр дэвшүүлэх саналыг оруулсан. Бага хурлын зааланд 3 хүний нэр нэмэгдэж, 4 хүн нэр дэвших санал гарсан. Хоёр нэр дэвшигч нэрээ татаад Гомбожавын Занданшатар, Ганзоригийн Тэмүүлэн гэсэн 2 нэр дэвшигчтэй өнөөдөр санал хураалт явагдаж, дүн гараад байна. Энэхүү бага хурлын үеэр шинэ ЕС-д нэр дэвшигчдээс өнөөгийн үүсээд байгаа улс төрийн нөхцөл байдал, улс орны нийгэм эдийн засгийн талаар олон асуулт асууж, 50-иад хүн цаашид анхаарах бодлогын асуудлуудаар санал бодлоо илэрхийлсэн. Бага хурлын 347 төлөөлөгч энэхүү санал хураалтад оролцож 67.84 хувийн саналаар Г.Занданшатарыг МАН-ын бага хурал МУ-ын ЕС-д нэр дэвшүүлэхээр боллоо. Үүний дагуу бага хурлын шийдвэр гарсан учраас тогтоол гарч, шийдвэр гарсан учраас маргааш бид МУ-ын ЕС-д Монгол Улсын Үндсэн хууль, бусад хуульд заасны дагуу шинэ ЕС-д нэр дэвшигчийг томилуулах саналаа хүргүүлэх болно.