Өнөөдөр буюу 2025 оны 7 дугаар сарын 30-ны өглөө 08:00 цагт Монгол Улсын Засгийн газрын ээлжит хуралдаан Төрийн ордонд эхэллээ. Энэ удаагийн хуралдаанаар улс орны эдийн засаг, эрчим хүч, гадаад харилцаа болон нийгмийн түншлэлтэй холбоотой хэд хэдэн чухал асуудлыг хэлэлцэж, зарим асуудлын хэрэгжилттэй танилцаж байна.

Хэлэлцэж буй гол асуудлууд:

• 2026 оны төсвийн төсөл боловсруулах ажлын явц – Ирэх оны төсвийн бодлогын баримт бичгийг боловсруулах хүрээнд хийгдэж буй бэлтгэл ажлын явц, төсвийн төсөлд тусгагдах чиглэлүүдийг хэлэлцэж байна.

• Газрыг улсын тусгай хэрэгцээнд авах тухай тогтоолын төслүүд – Стратегийн болон нийгэм, эдийн засгийн хувьд чухал газруудыг хамгаалалттай горимд шилжүүлэх, цаашдын зохион байгуулалтад хамруулах асуудлыг хэлэлцэж буй юм.

• Эрчим хүчний салбарын өвөлжилтийн бэлтгэл, ДЦС-3-ын сэргээн босголтын явц – Улаанбаатар хотын дулааны гол эх үүсвэрүүдийн нэг болох ДЦС-3 дулааны станцын сэргээн босголтын ажил, түүнчлэн 2025-2026 оны өвлийн ачааллыг давах бэлтгэл ажлын талаар Эрчим хүчний сайд болон холбогдох албаныхан танилцуулж байна.

• Хөдөлмөр, нийгмийн түншлэлийн гурван талт хэлэлцээрийн хэрэгжилт – Засгийн газар, ажил олгогч, ажилтан гурван талт хамтын ажиллагааны хүрээнд байгуулсан 2023–2025 оны улсын хэлэлцээрийн хэрэгжилтийн үр дүн, хэрэгжилтийн явц, цаашдын уялдаа холбоог хэлэлцэж буй.

• НҮБ-ын Хүнс, хөдөө аж ахуйн байгууллагын төлөөлөгчийн газар байгуулах хэлэлцээрийн төсөл – Монгол Улсад FAO (НҮБ-ын Хүнс, хөдөө аж ахуйн байгууллага)-ын албан ёсны төлөөлөгчийн газар байгуулах тухай Засгийн газар, тус байгууллагын хоорондын хэлэлцээрийн төслийг хэлэлцэж байна.

• Монгол-Хятадын Экспо арга хэмжээний бэлтгэл – Удахгүй болох Монгол-Хятадын хамтарсан Экспо арга хэмжээг зохион байгуулах Ажлын хэсгийг байгуулах асуудлыг мөн хэлэлцэж буй бөгөөд энэ хүрээнд эдийн засаг, худалдааны хамтын ажиллагааг өргөжүүлэх зорилготой.

Засгийн газрын ээлжит хуралдаанаар дээрхээс гадна цаг үеийн шинжтэй болон яаралтай шийдвэрлэх шаардлагатай бусад асуудлыг хэлэлцэхээр төлөвлөсөн байна.