Ерөнхий сайд Г.Занданшатар 2023 онд УИХ-ын дарга байхдаа Нэмэгдсэн өртгийн албан татварын (НӨАТ) буцаан олголтыг 5 хувь болгох саналыг олон нийтэд танилцуулж, олон мянган иргэний дэмжлэг авсан билээ. Өнөөдөр /2025.08.01/ өөрийн цахим хуудсаар дамжуулан энэхүү санаачилгыг Ерөнхий сайдын хувиар хэрэгжүүлэхээ илэрхийлэв.

Тэрбээр мөн 2026 оны улсын төсвийг иргэдтэй хамтран боловсруулах бөгөөд иргэдийн санал хамгийн үнэ цэнэтэй гэж онцлов. Өмнө нь эдийн засгийн нөхцөл байдлын улмаас санаачилгыг хэрэгжүүлж чадаагүй гэдгээ хэлсэн ч одоо иргэдийн итгэл нэмэгдэж байгааг тэмдэглэв.

НӨАТ-ын буцаан олголтыг 5 хувь болгох нь эдийн засгийн нөхцөл байдлаас шалтгаалан судалгаа, тооцоолол шаарддаг бөгөөд эцсийн шийдвэрийг УИХ гаргах болно гэдгийг онцлов.

Мөн 2016 оноос хойш татварын орлого нэмэгдсэн, аж ахуйн нэгжүүд болон иргэд татвараа ил тод төлж эхэлснээр буцаан олголтын хувь хэмжээг нэмэх боломжтой гэдгийг эдийн засагчид тайлбарлаж байна.