2025 оны 08 дугаар сарын 06-ны Засгийн газрын хуралдаанаас гарсан шийдвэрийн талаар Цахим хөгжил, инновац, харилцаа холбооны сайд Э.Батшугар танилцууллаа. Тэрбээр И-Баримтыг бүрэн цахимжуулах ажлыг эхлүүлээд буйг мэдэгдэв.

Одоогийн байдлаар жилд 1.2 тэрбум И-баримт хэвлэгдэж, үүнээс ердөө 45 хувь нь системд бүртгэгдэж байна. Үлдсэн 55 хувь нь бүртгэгдэхгүй үлдэж, татварын буцаан олголт авах боломжгүй болоод байгаа. Үүний шалтгаан нь:

• Баримтын үнийн дүн бага байх

• Бүдгэрч хэвлэгдэх

• Иргэд гараар шивэхээс залхуурч хаях зэргээс үүдэлтэй

Эдгээр хүндрэлүүдийг шийдвэрлэх зорилгоор Цахим хөгжлийн яамнаас И-Баримтыг банкны карттай холбох систем нэвтрүүлэх ажлыг эхлүүлжээ.

Иргэд банкны аппликейшнээр дамжуулан өөрийн сонгосон картуудаа И-Баримтын системтэй холбож тохируулалт хийснээр, тухайн картаар хийгдсэн худалдан авалт бүрийн баримт автоматаар И-Баримт аппликейшн руу бүртгэгдэх боломжтой болох юм.

Энэхүү шинэчлэл хэрэгжсэнээр:

• Гар аргаар шивэх шаардлагагүй болно

• Баримт хаягдахгүй

• Бүртгэгдэхгүй байсан 55 хувийн И-Баримтыг бүрэн цахимжуулах боломж бүрдэнэ

Иргэдэд хялбар, алдаагүй, бүрэн дүнгээрээ урамшуулал авах нөхцөл бүрдэх тус шинэчлэлийг ойрын хугацаанд бүрэн хэрэгжүүлэхээр ажиллаж байгааг сайд Э.Батшугар онцоллоо.