УИХ-ын гишүүн О.Алтангэрэл: АН-ын ҮБХ-ны хурал наймдугаар сарын 28-ны өдөр зарлагдсан. АН-ын хурлыг 30-ны өдөр зарласан. Энэ хурлаар ямар асуудал шийдэх вэ гээд харахаар АН-ын удирдлагын асуудлыг шийднэ. Дүрмийг шийднэ хэмээн зарласан байна. Улс төрийн намын тухай хууль 2016 онд батлагдсан. Улс төрийн намын тухай хуулийг дагаж мөрдөх журам мөн тухайн онд батлагдсан. Тус хуулийн хоёрдугаар зүйлд Улс төрийн намууд энэ хуульд нийцүүлэн дүрмээ шинэчлэн баталж, Улсын дээд шүүхэд хүргүүлнэ. Өөрчлөлтийг Улсын дээд шүүх 30 хоногийн дотор бүртгэж авна гэсэн тодорхой заалт байгаа. Харамсалтай нь АН-ын дүрмийн хэлэлцүүлэг гишүүддээ очсонгүй. Гишүүдээрээ дүрмийг хэлэлцүүлсэнгүй. Өөрөөр хэлбэл, АН-ын анхан шатны нэгж дээр байгаа гишүүд дүрэмдээ санал өгөх эрхээ хязгаарлуулсан. Бүр сайн яривал 2017 оны сунгаанаас хойш АН-ын удирдлагууд гишүүд дээрээ очсонгүй. Гишүүдээсээ санал авсангүй. Өнөөдөр ч гэсэн яаран тов зарлаад, хэдхэн хүний дунд намын дарга сонгоно гэж яриад яваа нь буруу байна. хамгийн түрүүнд намын дүрмээ баталъя. Жирийн гишүүд дээрээ оч. Жирийн гишүүдээрээ хэлэлцүүлье. Аймаг, дүүрэг дээр гишүүтэйгээ уулзъя. Ингээд намын дүрмээ батлах нь эрэмбийн хувьд зөв байна. Улс төрийн намын тухай хууль, Улс төрийн намын тухай хуулийг дагаж мөрдөх журмын тухай хууль дээр дүрмээ шинэчлэх хуулиар хүлээсэн үүргээ билүүлье. Үүний дараа дарга цэргийн асуудлаа яръя. 

 

УИХ-ын гишүүн Ч.Лодойсамбуу: Залуучууд улс төрийн намд элсэн орохдоо нэг л зүйлийг үргэлж ярьж байсан. Хэдхэн хүний тохиролцоонд, хэдхэн хүний зурсан зурган дундуур хэдхэн хүн асуудлыг тэрүүхэн тэндээ шийддэг байдлын эсрэг гэж шинэ үеийнхэн өөрсдийгөө нэрлэж улс төрд орж ирсэн. Зарчмын хувьд залуу гишүүдтэйгээ санал нэг байгаа зүйл нь өнгөрсөн хугацаанд намын тамга тэмдгийн асуудал, намын гэрчилгээний асуудал, Улсын дээд шүүхтэй холбоотой асуудлуудад яарсан үйлдэл болгон дээрээ даарсан. Зөндөө даарч үзсэн. Тийм учраас яараад яах вэ дээ гэдэг зарчим дээрээ бид санал нэгдэж байгаа. Одоо намын даргаа сонгоход 2005 оны намын тухай хуульд нийцүүлсэн зохицуулалтууд байгаа. Улс төрийн намын тухай хууль хэрэгжээд эхэлсэн. Одоо байгаа хуулийн заалтууд 3, 8 дугаар зүйл дээр намын удирдлага болгон бусад шатны албанд өрсөлдөх хүмүүсийг ямар нэгэн хэлбэрээр ялгаварлан гадуурхахгүй байх нарийн заалтыг оруулсан байгаа. Одоогоор албан ёсоор намын даргад нэрээ дэвшүүлсэн хүн байхгүй. Гэхдээ намын даргад өрсөлдөнө гэдгээ ил зарлачихсан хэд хэдэн хүн байх шиг байна. Эдгээр хүмүүс ч гэсэн эхлээд шинэ хуульдаа нийцүүлж намын дүрмээ баталсны дараа намыг даргын сонгуулиа явуулъя гэдэг саналтай байгаа.