Монгол Улсын Их хурлын Хууль зүйн байнгын хорооны дарга, эрхэм гишүүдээ Авлигатай тэмцэх тухай хуулийн 21 дүгээр зүйлийн 21.1, 21.4-т заасныг тус тус үндэслэн АТГ-ын даргаар Зандраагийн Дашдавааг улируулан томилох саналыг танилцуулж байна. З.Дашдавааг Монгол Улсын Их хурлын 2019 оны тавдугаар сарын 2-ны өдрийн 37 дугаар тогтоолоор  АТГ-ын даргаар томилсон бөгөөд бүрэн эрхийнхээ хугацаанд хуульд заасан чиг үүргийнхээ дагуу хариуцлагатай, шударгаар үр дүнтэй хэрэгжүүлэн ажилласан. З.Дашдаваа нь 1974 онд Хэнтий аймгийн Өндөрхаан хотод төрсөн. 51 настай. Яс үндэс халх. Эрэгтэй. Дээд боловсролтой хуульч мэргэжилтэй. Хууль зүйн ухааны доктор. Монгол Улсын гавьяат хуульч юм. Тэрбээр 1995-2019 оныг хүртэл цагдаагийн байгууллагад хэрэг бүртгэгч, эрүүгийн төлөөлөгчөөс эхлээд ЦЕГ-ын дотоод хяналт шалгалт аюулгүй байдлын хэлтэст тасгийн дарга, хэлтсийн дарга, ЦЕГ-ын газрын дэд даргаар дэвшин ажиллаж, 2019 онд АТГ-ын даргаар томилогдсон. Тэргүүн комиссар З.Дашдаваа нь цагдаагийн байгууллагад 24 жил, АТГ-т 6 дахь жилдээ, хууль сахиулах байгууллагад 30 дахь жилдээ ажилла байна. АТГ-ын дарга З.Дашдаваа нь  тус газрын даргаар томилогдон ажиллах хугацаандаа Хөгжлийн банк, Эрдэнэт үйлдвэрийн 49 хувь, Хөтөлийн цемент шохой, Дарханы төмөрлөгийн үйлдвэрийн хувьчлал, Оюутолгойн Дубайн гэрээ, БЗС, Нүүрсний, Ногоон автобусны зэрэг төрийн өндөр албан тушаалтнууд холбогдсон улсын аюулгүй байдал, эдийн засагт сөрөг үр дагавар бүхий их наядаар хэмжигдэх олон хэргүүдийг богино хугацаанд шалган тогтоох ажлыг удирдан, хууль сахиулах байгууллагуудтай хамтран хянан шийдвэрлээд байна.