С.ОТГОНБАЯР
Хууль зүйн байнгын хороо хуралдаж байна. АТГ-ын даргаар З.Дашдавааг улираан томилох асуудлыг хэлэлцэж асуулт асууж, хариулт авлаа.
УИХ-ын гишүүн Ж.Алдаржавхлан: Сайханбилэг гэж хүн АНУ-д оччихсон байгаа. Ойрын хугацаанд тэр хүнийг авчрах боломж бололцоо бий юу?
АТГ-ын дарга З.Дашдаваа: Тухайлсан хүний нэр асууж байх шиг байна. АНУ-тай эрх зүйн харилцан туслах гэрээ байхгүй. Өөрөө л ирэхгүй бол манай байгууллагын зүгээс болон хууль хүчний байгууллагаас арга хэмжээ авах бололцоо муутай байгаа.
УИХ-ын гишүүн Ч.Ундрам: АТГ-ын даргаар 6 жил ажилласан. Дахин улирч 6 жил ажиллах гэж байгаа хүнээс авлигын төсөөллийн индексийг асуухгүй байх аргагүй. Манай Монгол Улс авлигын төсөөллийн индексийн 100 онооноос 30 авсан. 30 гэдэг чинь муугийн муугийн муу гэсэн үг. Ард түмэн танд ийм дүн тавьсан байна. Авлигын индексээр бид 130 орноос 121-т орчихсон явж байгаа. Бидэнтэй зэрэгцээд авторатори дэглэмтэй улс орон, иргэний дайнтай орнууд явж байна. Энэ авлигын төсөөллийн индексыг та хүлээн зөвшөөрөх үү. Хоёрдугаарт, ирж байгаа гомдол мэдээлэл өссөн 1853 болсон гэж байна. Эндээс яг хэдэн хувь нь шийдэгдсэн байна вэ? Олон нийтийн анхааралд өртсөн хэргийг маш хурдан шийддэг. Анхааралд өртөөгүй бол шийдэхгүй удаагаад байдаг. 2-3 жил гацааж байгаа маш олон хэрэг байна. БЗС-тай маш олон хүн холбогдсон. Энд хэдэн хэрэг шалгаад, хэдэд нь хариуцлага тооцсон юм бэ. Яг хэдийг нь шүүхэд шилжүүлсэн бэ гэдэг тоог мэдмээр байна.
АТГ-ын дарга З.Дашдаваа: Авлигын индексийн төсөөллөөр манай улс 180 гаруй орноос 114 дүгээр байрт 33 оноотой явж байгаа. БЗС дээр хэрэг бүртгэлтийн 8 хэрэг, мөрдөн байцаалтын 2 хэрэг явж байна. Шүүхэд нэг хэрэг шилжүүлсэн. Өнгөрсөн онд 590 сая төгрөгийн хохирлыг БЗС-д нөхөн төлүүлсэн байдалтай байна. Нийт ирсэн өргөдөл гомдлын 98 хувийг бид шийдвэрлэсэн.
|
Улс төр
