С.ОТГОНБАЯР
УИХ-ын гишүүн Ч.Лодойсамбуугаас тодрууллаа.
-Ажил олгогчийн төлөх татварын хэмжээ буурснаар ажилтны цалин нэмэгдэх үү?
-Б.Түвшин нарын гишүүд нийлж Нийгмийн даатгалын ерөнхий хуульд өөрчлөлт оруулах хуулийн төслийг боловсруулаад өргөн барихад бэлэн болсон. Энд тодорхой гурван зохицуулалт явж байна. Нэгдүгээрт, ажил олгогчоос ажилтны өмнөөс төлдөг НДШ-ийг болиулах. Өөрөөр хэлбэл, ажилтан нийгмийн даатгал төлдөг. Ажил олгогч нь бас ажилтны өмнөөс НДШ төлдөг. Гэтэл ажил олгогчийн төлж байгаа НДШ нь ажилтны тэтгэвэрт ямар ч нөлөө үзүүлдэггүй. Өөрөөр хэлбэл, манай НДШ татвар, хураамж шиг явсаар ирсэн. Хоёрдугаарт, хөдөлмөрийн гэрээнээс бусад иргэний хуулиар зохицуулагддаг ажил гүйцэтгэх гэрээнээс хөлс авахаар түүнээс бас НДШ төлдөг. Энэ нь эргээд хувь хүн, хуулийн этгээдүүдийг бизнесээ төрөлжүүлэх, ажил хийхэд садаа учруулж байна. Хөдөлмөрийн хөлснөөс гадуурх бусад нэмэлт урамшуулал, хөнгөлөлт дэмжлэг, хоол унааны мөнгө бүх зүйлээс НДШ бүгдэд нь тооцож авдаг.
-Мөн ГБХНХ-ын яамнаас багц хууль оруулахаар бэлтгэж байгаа. Энэ нь ямар ялгаатай байна вэ?
-Л.Энх-Амгалан сайд ГБХНХ-ын яамнаас Нийгмийн даатгалын багц хуулийг өргөн барихаар бэлтгэж байгаа. Энэ нь үзэл баримтлалын хувьд арай өөр түвшний буюу нийгмийн даатгалын тогтолцоо, тэтгэврийн тогтолцооны суурь реформыг яаж хийх вэ гэдэг чиглэлээр хийж байгаа. Өнөөдөр даргын зөвлөлөөр танилцуулах юм шиг байна лээ. Гишүүдэд танилцуулаагүй. Өөрийнх нь өгч байгаа мэдээллээр олон тулгуурт тэтгэврийн тогтолцоо буюу хувийн тэтгэврийн компаниудыг оруулж ирэх боломж, хэдэн хувьтай байх, улсынх нь ямар хувьтай байх, энэ хоорондын зааг ялгаа юу байх вэ гэдгийг тогтоох болов уу гэж бодож байна. Бид байгаа нөхцөлийг нэг сарын өмнө ч болсон засаж байх тусмаа бизнес эрхлэхэд, ажил үйлс хийхэд Үндсэн хуулиараа эрх зүйн этгээд байна гээд заачихсан үед хувиараа бизнес эрхэлж, үйлчилгээ эрхлэх боломжгүй болчхоод байна. Үүнийг хурдан засах тусмаа бизнесийнхний нуруун дээр ирж байгаа дарамт бага ч гэсэн арилна.
|
Улс төр
