Хөл хорио тогтоох санал гараагүй, хөл хорио тогтоохгүй гэдгийг Улсын Онцгой комиссын хэвлэлийн төлөөлөгч Ц.Ганзориг өөрийн цахим хуудастаа мэдээлжээ. Тэрээр: "Уучлаарай хөл хорио тогтоох ямар ч санал хаанаас ч гараагүй. Засгийн газар болон УОК-оос давтан тунг насанд хүрсэн иргэддээ 6 сарын 15 гэхэд хийж дуусгахыг урьтал болгож байна. Өнөөдөр давтан тунг тариулаад 14-с дээш хоносон иргэд 36 хувь буюу насанд хүрсэн 3 хүн тутмын 1 нь байна. Энэ хүмүүсийн 99.5 хувь нь халдвараас хамгаалагдаж байна. Бүрэн вакцинжаагүй иргэд халдварт өртөж байгаа эрсдэлийг багасгахаар мэргэжлийн байгууллагууд ажиллаж байна. Өөрөөр хэлбэл 1 сая 186 мянган хүүхэд буюу хүн амын 40 хувь нь эрсдэлтэй. Түүнчлэн давтан тунгийн дархлаа тогтоогүй 1 сая орчим хүн эрсдэлтэй байсаар байна. Эхний тунтай, давтан тунгаа тариулаад 14 хоноогүй хүмүүс гэсэн үг. Иймээс маскаа зүүж, гараа ариутгаж, хүн хоорондын зай барих нь чухал байна" хэмээжээ.
