Монгол Улсад сүүлийн жилүүдэд Герман, Франц, БНХАУ, АНУ, БНСУ зэрэг улсаас уран бүтээлчид ирж, Монголын уран бүтээлчидтэй хамтарсан уран бүтээл хийж байна.
Онцолбол, 2020 оны хамгийн их үзэлттэй цуврал болох БНСУ-ын “Crash landing on you”, Олон Улсын XI Кино наадмын нээлтийн кино болох Франц, Бельгийн хамтарсан “Ер бусын ертөнц”, Австралийн найруулагч Бенийн “Strowlers”, БНСУ-ын JTBS сувгийн "Хүргэлт ирлээ" зэрэг кино, нэвтрүүлгүүд манай улсад зураг авалтаа хийсэн билээ.
Тэгвэл 2023 онд Сакай Масато, Абэ Хироши, Якүшо Коожи тэргүүтэй Японы алдар жүжигчдийн оролцон тоглосон “TBS” телевизийн “Vivant” олон ангит киноны хэсэгчилсэн зураг авалтыг Дархан-Уул аймагт хийж 45 уран бүтээлчид, 74 ажилтан, 100 гаруй иргэдийг хамруулсан байна.
Энэхүү олон ангит кинонд монгол уран бүтээлчдээс Б.Барслхагва, Х.Цасчихэр, Х.Нандин-Эрдэнэ, Г.Эрхэмбаяр нарын жүжигчид оролцон тоглосон юм.
Тэгвэл “Соёлын сэргэлт 2023” аяны хүрээнд Дархан-Уул аймгийн үзэгчдэд төрөлх хотод нь кино зураг авалтаа хийсэн “Vivant” олон ангит киноны нэгдүгээр ангийн нээлт өчигдөр "Дархан-Өргөө" кино театрт боллоо.
“Vivant” кино Монгол Улсын нутаг дэвсгэрт богино хугацааны зураг авалт хийхдээ нийт 6 гаруй тэрбум төгрөгийн эдийн засгийн эргэлтийг улсын хэмжээнд бий болгосон бол үүний 2.2 тэрбум төгрөгийг Дархан-Уул аймагт зарцуулсан нь манай улсын хувьд мэдлэгт суурилсан бүтээлч үйлдвэрлэлийн эдийн засаг хөгжих нөөц бололцоо бий гэдгийг харуулж байна.
Тиймээс Соёлын яамны зүгээс Дархан-уул аймагт кино зураг авалтын орчин бий болгох замаар гадаад, дотоодын жуулчдын анхаарал татахуйц соёлын орон зайг хөгжүүлэхээр орон нутгийн удирдлагатай хамтран ажиллаж байна.
