Б.УУГАНБАЯР
Багахангай дүүргийн 2 дугаар хороонд улсын төсвийн хөрөнгө оруулалтаар баригдах хоёр давхар бүхий Спорт цогцолборын барилгын шав тавих ёслол өчигдөр тохиолоо. Тус арга хэмжээнд захиалагч талаас Биеийн тамир, спортын улсын хорооны Хөрөнгө оруулалт, тоног төхөөрөмж, үйлдвэрлэл хариуцсан мэргэжилтэн Г.Базархүрэл, ашиглагч талаас Багахангай дүүргийн Засаг дарга С.Эрдэнэбаяр, Багахангай дүүргийн Биеийн тамир, спортын хорооны даргын албыг түр орлон гүйцэтгэгч Г.Тэмүүлэн болон тус барилгыг ажлыг гүйцэтгэгч тал “Алтай шар говь” компанийн захирал Ө.Арманбек нарын зочид оролцлоо.
Тус спортын цогцолборын барилга ашиглалтад орсноор иргэд олон улсын стандартад нийцсэн орчинд спортоор хичээллэх, эрүүл мэндээ дэмжих, ая тухтай орчинд нийтийн соёл, спортын арга хэмжээг зохион байгуулах боломж бүрдэх билээ. Барилгын ажлыг улсын төсвийн хөрөнгө оруулалт (1.3 тэрбум төгрөг)-аар “Алтай шар говь” ХХК уг барилгын угсралт, инженерийн шугам сүлжээ, цахилгаан холболт болон гадна тохижилтын ажлыг хийж, ирэх оны арванхоёрдугаар сарын 25-нд бүрэн дуусгаж, хүлээлгэн өгөх юм.
|
Спорт
