АДМИН
Өнөөдрийн УИХ-ын чуулганы нэгдсэн хуралдаанд Стандартчилал, техникийн зохицуулалт, тохирлын үнэлгээний итгэмжлэлийн тухай хууль /Шинэчилсэн найруулга/-ийн төсөл болон хамт өргөн мэдүүлсэн хуулийн төслүүдийн хэлэлцэх эсэхийг хэлэлцэж гишүүдийн олонх дэмжлээ.
Стандартчилал, техникийн зохицуулалт, тохирлын үнэлгээний итгэмжлэлийн тухай хуулийн шинэчилсэн найруулгын төсөлд дараах гол зохицуулалтыг тусгажээ.
Үүнд:
- Иргэн, аж ахуйн нэгж, байгууллага стандартчиллын баримт бичгийг сонгон хэрэглэх зохицуулалтыг өөрчилж, стандартыг иргэн, хуулийн этгээд дагаж мөрдөхөөр;
- Хуулийн зорилт, зарчим, нэр томьёог шинэчилж, стандартчилал, тохирлын үнэлгээний байгууллага, түүний тогтолцоо, салбар дундын уялдааг хангах зохицуулалтыг бусад хуульд нийцүүлэн томьёолсон;
- Нийтээр дагаж мөрдөх хэм хэмжээний актаар зохицуулж буй зарим харилцааг хуулийн төсөлд тусгаж, төрийн байгууллагын үйл ажиллагааны болон хяналт шалгалтын чиг үүрэг, энэхүү харилцаанд оролцогчдын эрх, үүргийг шинээр заасан;
- Монгол Улсын хэмжээнд дагаж мөрдөх стандарт, техникийн зохицуулалтыг боловсруулах, хэлэлцүүлэх, батлах үйл явцыг тодорхой болгож олон талын оролцоог нэмэгдүүлэхэд анхаарсан;
- Стандартын хэрэгжилтийг тодорхой хугацаанд үнэлж дүгнэх, стандартын баримт бичигт давтамжтай үзлэг хийх цаг үеийн хэрэгцээ шаардлагад нийцүүлэн шинэчилж, сайжруулах талаар зохицуулсан;
- Тохирлын үнэлгээний байгууллагуудыг бодлогоор дэмжих, эрх үүргийг тодорхой болгох, үүрэг хариуцлагыг нэмэгдүүлэх, төрийн хяналт шалгалтын үйл ажиллагаанд тохирлын үнэлгээний үр дүнг ашиглах, хүлээн зөвшөөрөхөд чиглэсэн;
- Худалдаан дахь тарифын бус саад тотгорыг арилгах хүрээнд стандарт, тохирлын үнэлгээний үр дүнг харилцан хүлээн зөвшөөрөхөөр зохицуулсан;
- Стандарт, техникийн зохицуулалтыг хэрэгжилтийн хяналтыг холбогдох эрх бүхий улсын байцаагч хэрэгжүүлэх, зах зээл дээрх болон Улсын хилээр орж ирж буй бараа бүтээгдэхүүн тохирлын баталгаатай эсэхэд хяналт тавих чиг үүргийг нарийвчлан тусгасан;
- Стандарт, тохирлын үнэлгээний чиглэлээр мэдээллийн сан бүрдүүлж ашиглах, тохирлын баталгаатайгаар улсын хилээр нэвтрүүлсэн бараа, бүтээгдэхүүний мэдээллийг төрийн байгууллага хооронд мэдээллийн сан үүсгэж ашиглах зохицуулалтыг шинээр нэмсэн;
- Чанар, стандартын шаардлага хангасан бүтээгдэхүүнийг зах зээлд нийлүүлэхэд иргэн, хуулийн этгээдийн эрх үүргийг тодорхой зааж, стандартын хэрэгжилтэд зөвхөн төрөөс хяналт тавих бус иргэн, үйлдвэрлэгч, нийлүүлэгч бүх талын оролцоог хангахаар зохицуулсан;
- Сорьцын хяналт шалгалтыг хэрэгжүүлэх зохицуулалтыг тусгаж, төрийн хяналт шалгалтын үр нөлөөг дээшлүүлэх, хувийн хэвшлийн үйл ажиллагааг дэмжих зэрэг олон талт хамтын ажиллагааны зохицуулалтыг тусгасан;
- Стандартын байгууллагын орон нутгийн нэгжийн чиг үүргийг нэмэгдүүлж, төвлөрлийг сааруулах бодлогыг хэрэгжүүлэх эрх зүйн зохицуулалтыг тусгасан;
Стандарт бол аюулгүй амьдралын баталгаа, улс орны хөгжлийн хамгийн зөв гарц шийдэл юм.
|
Нийгэм
