Улсын Их Хурлын Байгаль орчин, хүнс, хөдөө аж ахуйн байнгын хорооны өнөөдрийн /2025.07.03/  хуралдаан 11 цаг 24 минутад гишүүдийн 54.2 хувийн ирцтэйгээр эхэлж, хоёр асуудал хэлэлцэн шийдвэрлэв. Мөн уг хуралдаанаар “Засгийн газарт чиглэл өгөх тухай” Улсын Их Хурлын тогтоолын төслийг хэлэлцсэн. Тогтоолын төслийн талаар Улсын Их Хурлын гишүүн, ажлын хэсгийн ахлагч М.Ганхүлэг танилцуулав.

Тэрбээр танилцуулгадаа, Байнгын хорооны шийдвэрийн дагуу таван хүний бүрэлдэхүүнтэй ажлын хэсэг Малын генетик нөөцийн тухай хуулийн биелэлтийг хангуулах, Монгол малын генетик нөөцийг хамгаалах, ашиглалтын тогтвортой байдлыг хангах хүрээнд “Засгийн газарт чиглэл өгөх тухай”  таван санал бүхий Улсын Их Хурлын  тогтоолын төслийг  боловсруулж, Байнгын хорооны хуралдаанд оролцсон гишүүдийн 80 гаруй хувийн саналаар баталсан. Гэхдээ ажлын хэсгийн гишүүд зөвлөлдөөд уг асуудлыг Улсын Их Хурлын чуулганы нэгдсэн хуралдаанаар хэлэлцүүлэхээс өмнө төслийн 4 дэх заалт буюу үржлийн мал үржүүлгийн бүтээгдэхүүнийг Монгол Улсын хилээр нэвтрүүлэх, ашиглах үйл ажиллагааны бүртгэл хяналтыг сайжруулах нэгдсэн тогтолцоог бүрдүүлэх гэсэн хяналт шалгалттай холбоотой заалтыг хасах саналыг оруулж байгааг дурдлаа.  

Хэлэлцэж буй асуудалтай холбогдуулан УИХ-ын гишүүн Ж.Батжаргал дараах байр суурийг илэрхийллээ. 

"Хөдөө аж ахуйн яам, Малын удмын төв ажлаа хиймээр байна. УИХ хууль батлаад өгчхөөд байхад ажлаа хийхгүй хэн нэгний эрх ашгийг хангасан маягтай балай юм оруулж ирдэгээ болих ёстой. Улсын хэмжээнд үржлийн ажлын бодлого барих гэж байгаа бол тэрийгээ барь. Барихгүй бол барихгүйгээ хэл. Уг нь энэ жил улсын баяр наадам Монгол адууныхаа стандартад тулгуурлаж явагдах ёстой. Тэр ажил чинь хийгдээгүй. Сая та нар тэр шийдвэрийг ухраахаар маягтай юм гаргасан байсан. Хуулинд 2025 оны наадмаас эхэлж мөрдөхөөр заагдсан. Гэтэл УИХ хуулиа өөрчлөөгүй байхад ямар үндэслэл шийдвэрээр өөрчлөөд байгаа юм" хэмээлээ.