УИХ-ын чуулганы өнөөдрийн /2026.05.21/ нэгдсэн хуралдаанаар парламентын дотоод үйл ажиллагаа, төсөв, гадаад зээл болон сонгуулийн хуультай холбоотой хэд хэдэн томоохон хуулийн төслийг хэлэлцэхээр товложээ. Хуралдаан 10:00 цагт “Их хуралдай” танхимд эхэлнэ.

Хэлэлцэх асуудлын эхэнд УИХ-ын гишүүн Ж.Бат-Эрдэнэ нарын 12 гишүүний өргөн мэдүүлсэн багц хуулийн төслүүд багтсан байна. Тодруулбал, Монгол Улсын Их Хурлын тухай хууль, УИХ-ын чуулганы хуралдааны дэгийн тухай хууль, мөн УИХ-ын хяналт шалгалтын тухай хуульд нэмэлт, өөрчлөлт оруулах төслүүдийг хэлэлцэх эсэхийг шийдвэрлэх юм. Эдгээр төслүүд нь парламентын үйл ажиллагааны бүтэц, хяналтын механизмыг өөрчлөх агуулгатай гэж үзэж байна.

Мөн Засгийн газраас өргөн мэдүүлсэн “Гадаад зээлийн ашиглалт, үр ашгийг нэмэгдүүлэх тухай” хуулийн төслийн анхны хэлэлцүүлгийг хийхээр төлөвлөжээ. Сүүлийн жилүүдэд гадаад зээлийн зарцуулалт, үр өгөөжтэй холбоотой шүүмжлэл нэмэгдсэнтэй холбоотойгоор уг төсөл анхаарал татаж буй.

Түүнчлэн Ерөнхийлөгчийн сонгуулийн тухай хуульд нэмэлт, өөрчлөлт оруулах төслийг хэлэлцэх эсэхийг шийдэх бөгөөд уг төслийг УИХ-ын гишүүн Д.Бум-Очир нарын дөрвөн гишүүн өргөн мэдүүлсэн байна.

Өнөөдрийн хуралдаанаар мөн Эрүүгийн хуульд нэмэлт, өөрчлөлт оруулах тухай төсөл, олон хүүхэд төрүүлж өсгөсөн эхийг урамшуулах тухай хуульд өөрчлөлт оруулах төсөл, 2027 оны төсвийн хүрээний мэдэгдэл болон 2028-2029 оны төсвийн төсөөллийн тухай хуулийн төслүүдийг үргэлжлүүлэн хэлэлцэнэ.

Ингэснээр өнөөдрийн чуулганаар улс төр, эдийн засаг, төсөв санхүү болон парламентын үйл ажиллагаатай холбоотой олон чухал асуудлыг нэг дор хэлэлцэхээр байна.