АДМИН
УИХ-ын Төрийн байгуулалтын байнгын хорооны өнөөдөр /2026.07.01/-ийн хуралдааны эхэнд Олон нийтийн радио, телевизийн Үндэсний зөвлөлийн гишүүнд нэр дэвшигчийн сонсголын тайланг хэлэлцэв. Нэр дэвшигчийн сонсголд сонгон шалгаруулалтын журмын шаардлага хангасан 9 нэр дэвшигч оролцсоноос Д.Гүн-Үйлс, Д.Мягмарсүрэн, Д.Төрманлай, С.Од-Эрдэнэ Д.Наранцэцэг нар тэнцсэн талаар сонсгол даргалагч УИХ-ын гишүүн С.Зулпхар танилцууллаа. Хэлэлцүүлгийн явцад С.Од-Эрдэнэ, Д.Мягмарсүрэн, М.Төрманлай нарыг байнгын хорооны гишүүд дэмжсэнээр чуулганы хуралдаанд танилцуулахаар тогтов.
Үргэлжлүүлэн УИХ-ын 2026 оны намрын ээлжит чуулганы хугацаанд 8 байнгын хороо, 1 дэд хорооноос ирүүлсэн 25 төлөвлөгөөт хяналт шалгалт хийх цаглавар батлав. Үүнд: тайлан, илтгэл, мэдээлэл хэлэлцэх хүрээнд 16, хяналт шалгалтын бусад асуудлын хүрээнд ерөнхий хяналтын сонсгол 2, нэр дэвшигчийн сонсгол зохион байгуулах 1, хууль тогтоомжийн биелэлтийг хянан шалгах үнэлгээ хийх тус бүр 3 ажил, арга хэмжээ хийхээр төлөвлөсөн байна.
Хуралдааны төгсгөлд УИХ-ын 2026 оны намрын ээлжит чуулганаар хэлэлцэх асуудлын тухай тогтоол батлав. Намрын чуулганы хугацаанд Монгол улсын 2027 оны төсөв, Мөнгөний бодлого, УИХ-д өргөн мэдүүлсэн болон хэлэлцүүлгийн түвшинд явж байгаа 80 хуулийн төсөл, 8 тогтоолын 29 төслийг хэлэлцэхээр тогтоолын төсөлд тусгажээ.
|
Улс төр
