ТАТАР МАЙДАР
Олон улсын нэр хүндтэй шагнал: Монгол Улсын Ерөнхийлөгч Ухнаагийн Хүрэлсүхийг "Энх тайван, хөгжлийн манлайлагч"-аар өргөмжлөв
Монгол Улсын Ерөнхийлөгч Ухнаагийн Хүрэлсүхийн олон улсын дипломат харилцаанд гаргасан идэвх зүтгэл, тогтвортой хөгжил болон байгаль орчныг хамгаалах үйлсэд оруулж буй бодит хувь нэмрийг олон улсад өндрөөр үнэлж, түүнд “Хариуцлагатай хөрөнгө оруулалтын дэлхийн дээд шагнал” (Responsible Investment Global Award)-ыг олгож, “Монголын энх тайван, хөгжлийн манлайлагч” (The Mongolia Peace and Development Champion)-оор өргөмжлөн, уг дээд шагналыг Африк тивээс албан ёсоор гардуулахаар боллоо.
Зүүн Африкт төвтэй, олон нийтийн харилцаа болон мэдээлэл түгээх чиглэлээр үйл ажиллагаа явуулдаг нөлөө бүхий олон улсын байгууллага болох “Public Opinions” хорооноос энэхүү түүхэн шагналыг олгохоор шийдвэрлэсэн байна. Тус байгууллагын багийн ахлагч Буйинза Адам Лузиндана уг дэлхийн хэмжээний дээд шагналыг гардуулах албан ёсны ажлаар өдгөө Улаанбаатар хотод хүрэлцэн ирээд байна. Уг шагнал нь Ерөнхийлөгч Ухнаагийн Хүрэлсүхийн хэрэгжүүлж буй улс орныг өөрчлөх цогц шинэчлэлт, байгаль орчны манлайлал болон бүс нутгийн тогтвортой байдлыг хангахад гүйцэтгэж буй түүхэн үүргийг баталгаажуулсан хэрэг юм.
“Public Opinions” байгууллага нь улс орныхоо нийгэм, эдийн засгийг амжилттай өөрчилж, тогтвортой хөгжлийг цогцлоосон дэлхийн шилдэг төрийн зүтгэлтнүүдэд энэхүү хүндтэй шагналыг олгодог уламжлалтай. Урьд өмнө нь уг шагналыг Уганда улсын ерөнхийлөгч Йовери Кагута Мусевени, Кени улсын ерөнхийлөгч Уильям Руто, Танзани улсын ерөнхийлөгч асан Бенжамин Мкапа нарт тус тус гардуулж байжээ. Мөн тус хороо нь Италийн алдарт Болоньягийн их сургууль зэрэг дэлхийн хэмжээний нэр хүндтэй институтуудад олон улсын хүндэтгэлийг үзүүлж байсан түүхтэй.
Байгаль орчны манлайлал ба дотоодын тогтвортой хөгжлийн шинэчлэлтүүд
Ерөнхийлөгч Ухнаагийн Хүрэлсүхийг Монгол орны хэмжээнд цөлжилт, газрын доройтол, уур амьсгалын өөрчлөлтийн эсрэг чиглэсэн байгаль орчны идэвхтэй бодлогуудыг амжилттай хэрэгжүүлж буйг олон улсад өндрөөр сайшааж байна. Түүнчлэн түүний манлайлал дор төрийн байгууллагууд, хувийн хэвшлийн аж ахуйн нэгжүүд болон олон улсын түншүүд нэгдэн, улс орон даяар сая сая мод тарих амбицтай “Тэрбум мод” үндэсний хөдөлгөөнийг өрнүүлж, бүрэн дайчилж чадсаныг онцолжээ. Үүнээс гадна Ерөнхийлөгч Ухнаагийн Хүрэлсүх НҮБ-ын Ерөнхий Ассамблейгаас 2026 оныг “Олон улсын бэлчээр ба нүүдлийн мал аж ахуйн жил” болгон зарлах түүхэн тогтоолыг амжилттай санаачлан батлуулж, тогтвортой бэлчээрийн менежментэд дэлхийн хөрөнгө оруулалтыг татах гол хөшүүрэг болсон юм.
Дотоод бодлогын хүрээнд түүний засаг захиргаа Монголын "генетикийн өв санг" хамгаалах, уламжлалт анагаах ухааныг орчин үеийн эрүүл мэндийн тогтолцоонд бүрэн нэгтгэх үндэсний хэмжээний гол зарлиг, шийдвэрүүдийг дэмжин ажилласан байна. Мөн үндэсний хэмжээний “Хүнсний хангамж, аюулгүй байдал” хөдөлгөөнийг өрнүүлснээр Монгол Улс импортын хамаарлаа үлэмж хэмжээгээр бууруулж, орон нутгийн хөдөө аж ахуйн үйлдвэрлэлийг идэвхжүүлэн, бүс нутгийн дэд бүтцэд хэдэн зуун тэрбумын хөрөнго оруулалтыг чиглүүлж чадлаа. Үүний зэрэгцээ залуучууд болон эмэгтэйчүүдийг дэмжихэд чиглэсэн бодлого, бизнесийн салбарт оруулсан санхүүгийн хүчтэй хөрөнгө оруулалтууд нь улс орны хөгжил, нийгмийн тэгш байдал болон урт хугацааны эдийн засгийн тогтвортой байдлыг улам бүр бэхжүүлсээр байна.
Монгол Улсын Ерөнхийлөгч Ухнаагийн Хүрэлсүхийн товч намтар
Боловсролын байдал:
Ерөнхийлөгч Ухнаагийн Хүрэлсүх 1968 оны 6 дугаар сарын 14-ний өдөр Улаанбаатар хотод төрсөн. Тэрээр 1975–1985 онуудад Нийслэлийн 10 жилийн 2 дугаар дунд сургуулийг дүүргэж, 1989 онд Цэргийн нэгдсэн дээд сургуулийг (одоогийн Үндэсний батлан хамгаалахын их сургууль) Улс төр судлаач мэргэжлээр төгсжээ. Цаашид боловсролоо ахиулан Төрийн удирдлагын хөгжлийн институт (одоогийн Удирдлагын академи)-д Төрийн удирдлагын арга зүйч, зохион байгуулагчаар (1992–1994), Монгол Улсын Их Сургуулийн Хууль зүйн сургуульд Эрх зүйч мэргэжлээр (2000–2003) тус тус суралцаж төгссөн байна.
Ажлын гараа ба улс төрийн замнал:
- Тэрээр ажлын гараагаа 1989 онд Монголын Ардын Армийн 152 дугаар ангид улс төрийн орлогчоор эхлүүлсэн бөгөөд хурандаа цолтой.
- 1991 оноос Монгол Ардын Хувьсгалт Намын (МАХН) Төв хорооны Улс төрийн хэлтэст ажиллаж, улмаар 1994–2000 онуудад УИХ дахь МАХН-ын бүлгийн Ажлын албанд Нийгмийн бодлогын зөвлөхөөр ажиллажээ.
- Хууль тогтоох дээд байгууллагад 2000 онд Хэнтий аймгаас анх удаа сонгогдсон бөгөөд сүүлийн хоёр арван жилийн хугацаанд УИХ-ын гишүүнээр олон удаа сонгогдон ажилласан туршлагатай.
Удирдах албан тушаалууд:
Улс төрийн баялаг карьерынхаа хугацаанд тэрээр Засгийн газрын гишүүн, Онцгой байдлын асуудал эрхэлсэн сайд (2004–2006), Мэргэжлийн хяналтын асуудал эрхэлсэн сайд (2006–2008), мөн Монгол Улсын Шадар сайдын албыг хоёр удаа (2014–2015, 2016–2017) хашиж байв. 2008–2012 онуудад намын Ерөнхий нарийн бичгийн даргаар ажиллах үедээ 2010 онд намын түүхэн нэрийг сэргээн "Монгол Ардын Нам" (МАН) болгох ажлыг удирдан зохион байгуулж, 2017 онд МАН-ын Төв Хорооны даргаар сонгогдож байжээ.
Ерөнхий сайд болон Ерөнхийлөгчийн алба:
Тэрээр Монгол Улсын Төрийн тэргүүнээр сонгогдохоосоо өмнө 2017–2021 онуудад Монгол Улсын 30, 31 дэх Ерөнхий сайдаар ажиллахдаа авлигатай тэмцэх, төрийн албаны сахилга батыг сайжруулах болон цар тахлын үеийн хариу арга хэмжээг авахад гол анхаарлаа хандуулж байв.
2021 оны 6 дугаар сараас эхлэн Монгол Улсын Ерөнхийлөгч, Зэвсэгт хүчний Ерөнхий командлагч, Үндэсний аюулгүй байдлын зөвлөлийн тэргүүнээр ажиллаж байна. Түүний манлайлал улс орны улс төрийн тогтвортой байдлыг хангах, "Шинэ сэргэлтийн бодлого"-ыг урагшлуулах, үндэсний эв нэгдлийг бэхжүүлэх болон олон улсын тавцанд Монгол Улсын байр суурийг нэмэгдүүлж буйг "Public Opinions" зэрэг олон улсын байгууллагууд өндрөөр үнэлсээр байна.
|
Улс төр
