ASFAT нь Турк улсын Батлан хамгаалах яамны шууд харьяанд үйл ажиллагаа явуулдаг, төрийн өмчит батлан хамгаалахын хамгийн том гүйцэтгэгч холдинг. Тус корпораци нь Туркийн төрийн өмчит 27 зэвсгийн үйлдвэр болон 10 усан онгоцны зогсоол, үйлдвэрийг нэгтгэн удирддаг бөгөөд 30,000 гаруй өндөр мэргэжлийн боловсон хүчинтэй аварга бүтэц юм. 

Бүгд Найрамдах Турк Улсын Үндэсний батлан хамгаалахын дэд сайд Муса Хэебэтийн Монгол Улс дахь албан ёсны айлчлал үргэлжилж байна. Айлчлалын хүрээнд талууд хоёр улсын батлан хамгаалах салбарын хамтын ажиллагааг зөвхөн уулзалт, хэлэлцээгээр хязгаарлах бус, Зэвсэгт хүчний чадавхыг бэхжүүлэх бодит төсөл, хөтөлбөрүүд болгон өргөжүүлэх талаар санал солилцлоо.

Монгол, Туркийн харилцаа 2025 онд Стратегийн түншлэлийн түвшинд хүрсэн бөгөөд энэхүү түншлэлийг батлан хамгаалах салбарт бодит үр дүнгээр бататгах нь хоёр улсын чухал зорилт юм. 

Туркийн ASFAT компанитай хамтрах шинэ боломжууд

Уулзалтын үеэр батлан хамгаалах аж үйлдвэрийн хамтын ажиллагааг хөгжүүлэх асуудлыг голчлон хэлэлцэж, Туркийн батлан хамгаалах аж үйлдвэрийн аварга нэгдэл болох ASFAT (Askeri Fabrika ve Tersane İşletme) корпорацитай хамтран ажиллах саналыг онцоллоо. Энэ хүрээнд Монголын инженер, техникийн мэргэжилтнүүдийг Турк улсад сургаж, дадлагажуулах боломжийг өргөжүүлэхээр тохиролцов. 

Туркийн тал Монгол Улсын батлан хамгаалах аж үйлдвэрийг дэмжихэд бэлэн байгаагаа илэрхийлж, дараах шинэ чиглэлүүдээр хамтран ажиллах санал дэвшүүллээ: 

• Нисгэгчгүй нисэх төхөөрөмж (Дрон) технологи

• Кибер аюулгүй байдал болон мэдээллийн хамгаалалт

• Сансрын технологийн ашиглалт

• Хилийн аюулгүй байдлыг дэвшилтэт техникээр бэхжүүлэх 

Өнөөдрийг хүртэл Турк Улсад Монголын 350 орчим цэргийн сонсогч, алба хаагч суралцаж төгссөн бөгөөд цаашид цэргийн боловсрол, хамтарсан сургалт, олон улсын хээрийн сургуулилалтын харилцааг улам гүнзгийрүүлэхээр талууд тохиролцсон байна. 

Туркийн ASFAT гэж ямар компани вэ?

ASFAT нь Турк улсын Батлан хамгаалах яамны шууд харьяанд үйл ажиллагаа явуулдаг, төрийн өмчит батлан хамгаалахын хамгийн том гүйцэтгэгч холдинг бөгөөд тус корпораци нь Туркийн төрийн өмчит 27 цэргийн зэвсгийн үйлдвэр болон 10 усан онгоцны зогсоол, үйлдвэрийг нэгтгэн удирддаг бөгөөд 30,000 гаруй өндөр мэргэжлийн боловсон хүчинтэй аварга бүтэц юм. 

"АСФАТ" компанийн дэлхийд алдартай зэвсэг, техникүүд:

Тус компани нь хуурай замын зэвсэглэл, агаарын тээврийн шинэчлэл болон тэнгисийн цэргийн инженерчлэлээрээ олон улсад хүлээн зөвшөөрөгдсөн бөгөөд тэдний дараах бүтээгдэхүүнүүд дэлхийн зах зээлд хамгийн өндөр эрэлттэй байдаг:

• MEMATT (Минанаас цэвэрлэгч механик систем): Энэхүү алсын удирдлагатай, хуягласан робот машин нь батлан хамгаалах салбарт маш өндөр үнэлэгддэг. Энэ нь хүний амь насыг эрсдэлд оруулахгүйгээр мина болон тэсрэх бөмбөгийг талбайгаас автомат аргаар устгах зориулалттай бөгөөд НАТО болон Ази, Ойрхи Дорнодын хэд хэдэн улсад экспортлогдсон байна. 

• MİLGEM хөтөлбөрийн байлдааны хөлөг онгоцууд: АСФАТ нь Туркийн тэнгисийн цэргийн бахархал болох "Ada-class" корветт болон "Istanbul-class" фрегат хөлөг онгоцуудын үндсэн гүйцэтгэгчээр ажилладаг. Тэд саяхан Пакистан, Украин болон НАТО-гийн гишүүн Румын улсад байлдааны хөлөг онгоц амжилттай нийлүүлж, түүхэн том экспортын гэрээнүүдийг хийжээ.

• ARPAN 155 мм-ийн өөрөө явагч их буу: "Aselsan" болон "BMC" компаниудтай хамтран бүтээсэн 8х8 хүнд даацын ачааны машин дээр суурилсан энэхүү ухаалаг их бууны систем нь туулах чадвар өндөр, галын хүч асар их тул орчин үеийн хуурай замын байлдааны тактикт өргөн ашиглагдаж байна. 

• HGK Ухаалаг чиглүүлэгч иж бүрдэл: Энгийн агаарын бөмбөгийг лазер болон GPS-ийн тусламжтайгаар өндөр нарийвчлалтай ухаалаг пуужин болгон хувиргадаг технологийн иж бүрдлийг АСФАТ Туркийн Агаарын цэрэгт зориулан үйлдвэрлэдэг. 

Монгол Улс ийнхүү дэлхийн жишигт хүрсэн технологитой Туркийн төрийн өмчит аварга компанитай шууд харилцаа тогтоосноор өөрийн цэргийн инженерчлэлийг чанарын шинэ шатанд гаргах, кибер хамгаалалт болон дрон технологийн дотоодын баазыг бэхжүүлэх бодит алхам болж байна.