Финланд, Монгол Улс хоёр талын харилцаа, худалдаагаа өргөжүүлэхээ мэдэгдэж байна.

Бүгд Найрамдах Финланд Улсын Ерөнхийлөгч Александер Стубб, Монгол Улсын Ерөнхийлөгч Ухнаагийн Хүрэлсүх нар Хельсинки хотноо уулзаж, хоёр улсын худалдааг бэхжүүлэх зэрэг өргөн хүрээний асуудлаар хэлэлцээ хийлээ хэмээн Daily Finland мэдээлэв. 

Уулзалтын үеэр болон айлчлалын хүрээнд өрнөсөн гол үйл явдлуудыг багцлан хүргэж байна.

1. Финланд-Монголын Бизнес форум

Төрийн тэргүүн нар Төрийн ордны цогцолборт (House of the Estates) зохион байгуулагдсан Финланд-Монголын Бизнес форумд хамтдаа оролцож, хоёр орны бизнесийн боломжуудын талаар хэлэлцэв. 

• Финландын Ерөнхийлөгч Александер Стубб өөрийн "X" (Твиттер) хуудсаараа дамжуулан: "Монгол Улсад Финландын туршлага, ялангуяа ногоон технологи, дижиталчлал болон боловсролын салбарт ихээхэн эрэлт хэрэгцээ байна. Энэхүү айлчлал нь хоёр орны худалдааг бэхжүүлнэ гэдэгт итгэлтэй байна" хэмээн онцолжээ. 

• Мөн уул уурхай, ашигт малтмал, цэвэр эрчим хүч, боловсрол, цахим шилжилтийн салбарт хамтын ажиллагааг гүнзгийрүүлэх бүрэн боломжтойг дурдсан байна. 

2. Нийтлэг үнэт зүйлс ба Олон улсын харилцаа

Ерөнхийлөгчийн ордонд болсон албан ёсны уулзалтын үеэр хоёр талын харилцаа, бүс нутгийн аюулгүй байдал болон олон талт хамтын ажиллагааны талаар ярилцжээ.

Ерөнхийлөгч А.Стубб: "Финланд, Монгол Улсад ижил төстэй талууд олон бий. Бид хоёулаа ардчилал, тогтвортой байдлыг эрхэмлэдэг. Том хөршүүдийн зэргэлдээ оршдог жижиг орнууд бөгөөд НҮБ болон олон талт тогтолцоог тууштай дэмжигчид" хэмээн тэмдэглэв. Үүний зэрэгцээ тэрээр Монгол Улсын Ерөнхийлөгчид Европын өнөөгийн аюулгүй байдлын нөхцөл байдал болон Орос-Украины дайны талаарх мэдээллийг хуваалцсан байна. 

3. Хамтын ажиллагааны 4 санамж бичиг байгуулав

Ерөнхийлөгч У.Хүрэлсүхийн айлчлалын үеэр Монгол, Финландын талууд боловсрол болон соёлын салбарын хамтын ажиллагааг эрчимжүүлэх зорилготой 4 ч чухал Санамж бичигт (MoU) гарын үсэг зурлаа.

4. Парламентын даргатай хийсэн уулзалт

Ерөнхийлөгч У.Хүрэлсүх Хельсинки хотноо ажиллах үеэрээ Финландын Парламентын дарга Юсси Халла-ахотой уулзаж, хоёр улсын хууль тогтоох байгууллага хоорондын харилцааны талаар санал солилцжээ.