Өмнөд Солонгосын алдартай жүжигчин Ча Е Рён (Cha Ye Ryun) сургуульд байхдаа бусдыг дээрэлхэж, хүчирхийлэл үйлдэж байсан гэх дуулианы төвд ороод байна. Түүний харьяалагддаг "HB Entertainment" агентлаг 2026 оны 11 дүгээр сарын 4-ний өдөр албан ёсны мэдэгдэл гаргаж, цахим орчинд тархаад буй эдгээр цуу яриаг "ямар ч үндэслэлгүй худал мэдээлэл" хэмээн эрс няцааж, хуулийн дагуу хатуу арга хэмжээ авахаа зарлалаа.

Дуулиан хэрхэн эхэлсэн бэ?

Энэхүү маргаан аравдугаар сарын сүүлээр нэгэн нэрээ нууцалсан иргэн дунд сургуульд байхдаа 1985 онд төрсөн нэгэн алдартай жүжигчин бүсгүйд дээрэлхүүлж, бие махбодын хүчирхийлэлд өртөж байсан тухайгаа цахим хуудсанд нийтэлснээр эхэлжээ. Хэдийгээр анхны постон дээр жүжигчний нэрийг шууд дурдаагүй ч цахим хэрэглэгчид төрсөн он, төгссөн сургуулийнх нь түүх зэрэг мэдээлэлд үндэслэн уг хүн нь Ча Е-рён байж болзошгүй хэмээн таамаглаж, түүний нэрийг холбож эхэлсэн байна.

Улмаар 11 дүгээр сарын 2-ны өдөр уг постыг түр хаасан ч дуулиан намжсангүй, харин ч түүний нөхөр болох алдартай жүжигчин Жүү Сан-вүүк (Joo Sang Wook)-ийн хувийн сошиал хуудас руу дайрч, гэр бүлийг нь хамтад нь шүүмжлэх хандлага газар авчээ.

Дээрэлхэх дуулиан дээр нэмэгдсэн "бүдүүлэг харилцаа"-ны гомдол

Сургуулийн үеийн хүчирхийллийн дуулиан даамжирч байх зуур буюу 11 дүгээр сарын 3-ны өдөр Ча Е Рён рүү чиглэсэн өөр нэгэн гомдол цахим орчинд гарч ирэв. Гольфын талбайд кэдди (туслах ажилтан) хийдэг байсан гэх нэгэн иргэн жүжигчин бүсгүйг өөртэй нь маш бүдүүлэг, дээрэнгүй харьцсан хэмээн буруутгажээ. Гэвч тухайн ажилтны хэлсэн түүх болон тэнд ажиллаж байсан эсэх нь одоогоор албан ёсоор тогтоогдоогүй, батлагдаагүй байгаа юм.

Агентлагийн байр суурь: Гэр бүл рүү нь дайрвал хуулийн дагуу хариуцлага тооцно

Жүжигчний гэр бүл рүү чиглэсэн дайралт хэрээс хэтэрсэн тул "HB Entertainment" компани дараах хатуу мэдэгдлийг хийлээ:

"Баталгаагүй, нэрээ нууцалсан иргэдийн ам дамжсан ярианаас болж жүжигчний гэр бүл, нөхөр рүү нь хүртэл дайрч, хувийн шинжтэй доромжлол явуулж байгаад харамсаж байна. Бид худал мэдээлэл тараасан, гүтгэсэн бүх баримтыг цуглуулж байгаа бөгөөд хуулийн дагуу шүүхэд гомдол гаргаж, ямар ч өршөөлгүйгээр хатуу тэмцэх болно."

Одоогоор Ча Е Рён сургуулийн хүчирхийлэлд холбоотой эсвэл гольфын талбайд бүдүүлэг авирласан гэдгийг нотлох ямар ч бодит, объектив баримт олдоогүй байгааг солонгосын хэвлэлүүд онцолж байна.

1985 оны 7-р сарын 16-нд Сөүл хотын Нувон дүүргийн Жунге-дон хороололд хоёр охины бага нь болж төрсөн Ча Е Рён нь Буддын шашинтан юм. Тэрээр 2003 онд "Seoul Collection" арга хэмжээнд загвар өмсөгчөөр анх олны өмнө гарч, 2004 онд SBS телевизийн "Island Village Teacher" олон ангит киногоор жүжигчний замналаа эхлүүлжээ.

Түүний тоглосон алдартай бүтээлүүдийн тоонд "Working Mom" ​​(SBS, 2008), "Royal Family" (MBC, 2011), "Golden Rainbow" (MBC, 2013), "My Lovely Girl" (SBS, 2014), "Glamorous Temptation" (MBC, 2015), "Gracious Revenge" (KBS 2TV, 2019), "Gold Mask" (KBS 2TV, 2022) зэрэг олон ангит кинонууд багтдаг. Мөн тэрээр "Voice" ("Whispering Corridors" цувралын дөрөв дэх анги, 2005) болон "My Black Mini Dress" (2011) зэрэг уран сайхны кинонуудад дүр бүтээсэн билээ.