Монголын Үндэсний Морин Уралдаан, Уяачдын холбооны II их хурал болж байна. Хуралд оролцогчид морин уралдааны уламжлал, хөгжлийг хадгалахын төлөө санал бодлоо илэрхийлж, цаг үеийн чухал асуудлуудыг хөнджээ.

Энэ үеэр залуу уяач Л.Баяртүрүү хэлэхдээ: “Өнөөдөр хавар дөрвөн сард эхийнхээ хээлээс гарсан унага ихсээ задалж амжаагүй байхдаа үхэж байна. Эрлийз адуу үе мөчний өвчин тээж төрж байна. Хөдөө аж ахуй энэ асуудлууд дээр ажиллаж байгаа юу? Мал яагаад ингэж төрж үхэж байна. Энэ асуудлууд дээр ажиллахгүй байж нэг л их докторууд гарч ирэн бичсэн цаасандаа төөрөөд тайлангаа тавьж чадахгүй байна” гэж онцолсон юм.

Түүний үг нь малын эрүүл мэнд, адууны өвчлөл болон хөдөө аж ахуйн салбарын тулгамдсан асуудлуудыг шийдвэрлэх шаардлагатайг илтгэж байгаа юм. Эдгээр асуудлыг шийдэхгүй бол монголын адууны үүлдэр, уяачдын аж ахуйд сөргөөр нөлөөлөх болно гэдгийг тэрбээр анхааруулж байна.

Хуралд оролцогчид энэ асуудлыг чухалчилж, мэргэжлийн байгууллагууд, судлаачдын хамтран ажиллах шаардлагатайг онцолжээ. Морин уралдааны уламжлал, уяачдын аж ахуйг тогтвортой хөгжүүлэхийн тулд эрүүл адуу, малын амьжиргааны асуудлуудыг шийдвэрлэх нь хамгийн чухал гэдгийг хуралд оролцогчид санал нэгдсэн юм.