Монгол Улсын Гавьяат тамирчин, мэргэжлийн боксын ялагдалгүй цувралыг үргэлжлүүлж буй Эрдэнэбатын Цэндбаатар карьерынхаа хамгийн чухал тулаануудын нэгийг хийхээр АНУ-ын Техас мужийн Эль-Пасо хотноо бэлтгэлээ хангаад байна. Тэрбээр тус хотын "County Coliseum" ордонд зохион байгуулагдах ProBox Championship Series эвэнтийн хүрээнд Тажикистаны шилдэг боксчин Мухаммадхуча Якубов-той хүч үзнэ.

Хоёр тамирчин хоёрдугаар хөнгөн жин буюу 58.97 кг (130 фунт)-ын ангилалд WBC USA аваргын бүсний төлөө 10 үе тулалдах юм.

ТЭНЦҮҮХЭН ӨРСӨЛДӨӨН БА ЧАНСААНЫ ТУЛААН

Энэхүү тулаан нь WBC холбооны чансааны шилдэг аравт багтсан хоёр хүчтэй өрсөлдөгчийн тулаан гэдгээрээ онцлог болж байна:

• Эрдэнэбатын Цэндбаатар (Монгол): Мэргэжлийн рингэнд 15 тулалдаж, 15 ялсан (нэг ч ялагдалгүй) амжилттай яваа бөгөөд WBC холбооны чансааны 10-р байрт бичигдэж байна.

• Мухаммадхуча Якубов (Тажикистан): 31 настай, туршлагатай боксчин тэрбээр мэргэжлийн замналдаа 23 ялалт, 1 ялагдал, 1 тэнцээ байгуулсан үзүүлэлттэй, WBC чансааны 7-р байрт эрэмбэлэгдэж буй ширүүн өрсөлдөгч юм.

Уг тулаанд ялалт байгуулсан тамирчин WBC USA аваргын бүсийг эзэмшихээс гадна дэлхийн аваргын бүсний төлөө өрсөлдөх чансаагаа эрс ахиулах боломжтой болно.

ХЭЗЭЭ, ХААНААС ҮЗЭХ ВЭ?

Цагийн зөрүүнээс шалтгаалан АНУ-ын зүүн эргийн цагаар 11-р сарын 13-ны оройн 19:00–20:00 цагийн орчимд эхлэх тус тэмцээн Улаанбаатарын цагаар маргааш өглөө буюу 2026 оны 11-р сарын 14-ний Бямба гарагийн 09:00 цагаас шууд хүрнэ. Үндсэн тулаан болох Э.Цэндбаатарын рингэнд гарах мөч өглөөний 11:00 цагийн орчимд таарах төлөвтэй байна.

Бокс сонирхогчид тулааныг олон улсын ProBox TV YouTube сувгаар үнэ төлбөргүй, шууд хүлээн авч үзэх боломжтой. 

ӨРСӨЛДӨГЧ МУХАММАДХУЧА ЯКУБОВ ГЭЖ ХЭН БЭ?

Энэ удаад Э.Цэндбаатарын өмнө зүгээр нэг чансаа өндөртэй тамирчин бус, харин тус бүсийг одоо эзэмшиж буй аварга зогсож байна:

• Намтар: Мухаммадхужа Искандарович Якубов нь 1995 оны гуравдугаар сарын 31-нд Тажикистаны Исфара хотод төрсөн. Хөнгөн болон хоёрдугаар хөнгөн жингийн ангилалд тулалддаг мэргэжлийн боксчин агаад Тажикстан, ОХУ-ын хос иргэншилтэй нэгэн юм..

• Цол хэргэм: Тэрбээр WBC, WBA, IBF болон WBO холбоодын бүс нутгийн болон залуучуудын олон аваргын бүсийг эзэмшиж байсан туршлагатай. Хамгийн гол нь тэрбээр 2025 оноос хойш хоёрдугаар хөнгөн жинд WBC USA-гийн одоогийн аваргаар тодроод байгаа бөгөөд WBC холбооны дэлхийн аваргын бүсний заавал өрсөлдөх (mandatory) албан ёсны нэр дэвшигч юм.

• Амжилтын үзүүлэлт: Мэргэжлийн рингэнд 23 ялалт, 1 ялагдал, 1 тэнцээ байгуулсан, WBC чансааны 7-р байрт эрэмбэлэгдэж буй ширүүн өрсөлдөгч аж.