Б.УУГАНБАЯР
ЗГХЭГ-ын дарга Н.Учрал "Төгрөг нуурын орд"-ыг Ерөнхийлөгч асан УИХ-ын гишүүн Х.Баттулга үндэстэн дамнаж оффшор бүсэд 250 сая ам.доллароор зарсан тухай асуудлыг хөндөж 507 хуудас бүхий баримт материалыг Авлигатай тэмцэх газарт хүргүүлсэн байдаг. Уг асуудлыг АТГ-аас тодрууллаа.
АТГ-ын ОНХМ, комиссар Б.Билэгт:
АТГ-ын мөрдөн шалгах хэлтэс материалыг 2025 оны дөрөвдүгээр сарын 14-ний өдөр хүлээн авч хянаж үзээд 2025 оны дөрөвдүгээр сарын 17-ны өдөр Эрүүгийн хуулийн тусгай ангийн 22.1 дүгээр зүйлийн 3, 18.6 дугаар зүйлийн 1 дэх хэсэгт зааснаар буюу Эрх мэдэл албан тушаалын байдлаа урвуулан ашиглах, мөнгө угаах зэрэг үндэслэлээр хэрэг бүртгэл нээсэн. Мөрдөн шалгах ажиллагаа явагдаж байна. Тиймээс мөрдөн шалгах ажиллагааны нууцтай холбогдуулан өөр дэлгэрэнгүй мэдээлэл өгөх боломжгүй байна гэв.
МУ-ын Эрүүгийн хууль
22.1 дүгээр зүйл.Эрх мэдэл, албан тушаалын байдлаа урвуулан ашиглах
22.1.3 Энэ зүйлийн 1, 2 дахь хэсэгт заасан гэмт хэргийг улс төрд нөлөө бүхий этгээд, төрийн болон орон нутгийн өмчит, төрийн болон орон нутгийн өмчийн оролцоотой компани, улсын үйлдвэрийн газрын удирдах, эрх бүхий албан тушаалтан үйлдсэн бол нийтийн албанд ажиллах эрхийг бүх насаар хасаж таван жилээс арван хоёр жил хүртэл хугацаагаар хорих ял шийтгэнэ.
18.6 дугаар зүйл.Мөнгө угаах
18.6.1 Гэмт хэргийн улмаас олсон хөрөнгө, мөнгө, орлого гэдгийг мэдсээр байж түүнийг авсан, эзэмшсэн, ашигласан; түүний хууль бус эх үүсвэрийг нь нуун далдлах, гэмт хэрэг үйлдэхэд оролцсон аливаа этгээдэд хуулийн хариуцлагаас зайлсхийхэд туслах зорилгоор өөрчилсөн, шилжүүлсэн; түүний бодит шинж чанар, эх үүсвэр, байршил, захиран зарцуулах арга, эзэмшигч, эд хөрөнгийн эрхийг нуун далдалсан бол зургаан сараас нэг жил хүртэл хугацаагаар зорчих эрхийг хязгаарлах, эсхүл зургаан сараас нэг жил хүртэл хугацаагаар хорих ял шийтгэнэ.
|
Нийгэм
