УИХ-ын Төрийн байгуулалтын байнгын хорооны өнөөдрийн хуралдаанаар, "Оюутолгой ордын ашиглалтад Монгол Улсын эрх ашгийг хангуулах тухай" УИХ-ын тогтоолын хэрэгжилтэд хяналт тавих үүрэг бүхий Түр хороо байгуулах тогтоолын төслийг хэлэлцэхийг дэмжлээ.
Төслийг УИХ-ын гишүүн Ц.Даваасүрэн хуралдаанд танилцуулав. УИХ-ын нэр бүхий 20 гаруй гишүүн “Оюутолгой ордын ашиглалтад Монгол Улсын эрх ашгийг хангуулах тухай” УИХ-ын 2019 оны 92 дугаар тогтоолын хэрэгжилтэд хяналт тавих, санал боловсруулж, дүнг нэгдсэн чуулганд танилцуулах үүрэг бүхий Түр хороо байгуулах тогтоолын төсөл санаачлан боловсруулжээ.
Оюутолгойн ордын гэрээг Монгол Улсын эрх ашигт нийцүүлж ашигтай болгох, Дубайн гэрээг цуцлах асуудал УИХ, Засгийн газрын түвшинд идэвхтэй өрнөж, ажлын баг байгуулагдан ажиллаж, улмаар талууд хэлэлцээр хийж нэгдсэн шийдэлд хүрэхээр ажиллаж байна. Иймээс үүсээд буй одоогийн нөхцөл байдлын үед асуудалд хувь гишүүний бус улс орны эрх ашгийн үүднээс нэг мөр ойлголттой, нэгдсэн байр суурьтай хандах шаардлагыг харгалзан УИХ-ын бүтцэд уг асуудлыг хариуцсан Түр хороо байгуулах нь зүйтэй гэж төсөл санаачлагч гишүүд үзсэн байна.
Түр хороо УИХ-ын гишүүн Ц.Даваасүрэнгээр ахлуулан УИХ-ын гишүүн Ш.Адьшаа, П.Анужин, Т.Аюурсайхан, Ё.Баатарбилэг, Б.Бат-Эрдэнэ, Х.Болорчулуун, С.Бямбацогт, С.Ганбаатар, Г.Ганболд, Н.Ганибал, Х.Ганхуяг, Г.Дамдинням, Б.Дэлгэрсайхан, Б.Жаргалмаа, Ж.Мөнхбат, Ц.Сандаг-Очир, Ж.Сүхбаатар, Г.Тэмүүлэн, Ч.Ундрам, С.Чинзориг, Б.Энхбаяр нарын бүрэлдэхүүнтэй байгуулж ажиллахаар төсөлд тусгажээ.
Тогтоолын төсөлтэй холбогдуулан гишүүд асуулт асууж тодруулан байр сууриа илэрхийлсэн бөгөөд Байнгын хорооны хуралдаанд оролцсон гишүүдийн олонх нь Түр хороо байгуулах тухай тогтоолын төслийг үзэл баримтлалын хүрээнд хэлэлцэхийг дэмжлээ.
