Дэд ахлагч Энхбаатарын Буджав Үндэсний Батлан хамгаалахын их Сургуулийн Ерөнхий цэргийн ангид 2017-2018 онд суралцаж байгаад ОХУ-ыг зорьж, Кострома хотод Цацраг, хими, биологийн зэвсгээс хамгаалах цэргийн академид 3 дахь жилдээ суралцаж байна.
Тэрээр манай улсад зохион байгуулагдсан олон уралдаан, тэмцээнд амжилттай оролцсоны үр дүнд олс таталтын спортын дэд мастер, хүчний гурван төрөлт (поуэрлифтинг)-өөр мөн спортын дэд мастерын болзлыг хангасан залуу тамирчин юм.
Тодруулбал, ҮБХИС-д суралцаж байхдаа 2017 онд Зэвсэгт хүчний олс таталтын аварга шалгаруулах тэмцээнээс багаараа хүрэл медаль, 2021 онд Зэвсэгт хүчний туухай өргөлтийн аварга шалгаруулах тэмцээнээс хос мөнгөн медаль мөн 2018 онд дээрх тэмцээнээс хүрэл медаль хүртэж байлаа.
Дэд ахлагч Э.Буджав нь ОХУ-д суралцах хугацаандаа туухай өргөлтөөр тууштай хичээллэсний үр дүнд олон амжилтын эзэн болсны ажээ. Тухайлбал, тэрээр 2022 онд Азийн аварга шалгаруулах туухай өргөлтийн тэмцээний 68 килограммын жинд хос мөнгөн медаль, Олон улсын “Цагаан шөнө” тэмцээнээс алтан медалийг хүртээд байна. Мөн ОХУ-ын Кострома хотын аварга шалгаруулах тэмцээнээс 3 жил дараалан мөнгөн медаль, ОХУ-ын Хойд бүсийн аварга шалгаруулах тэмцээнээс хүрэл медаль хүртсэн амжилтыг гаргасан.
Хурандаа Б.ОТГОНБАЯР
