2022 оны 11-р сарын 25-нд ХСҮТ-ийн Сувилахуйн албанаас хавдрын сувилахуйн Эрдмийн бага хурлыг амжилтай зохион байгууллаа. Эрдмийн бага хурлыг Эмнэлгийн тусламж үйлчилгээ эрхэлсэн дэд захирал С.Хүрэлсүх нээж, Ерөнхий захирал, АУ-ны доктор, дэд профессор Н.Эрдэнэхүү “ХСҮТ-ийн өнөөгийн байдал цаашдын чиг хандлага” сэдэвт зочин илтгэл тавьлаа.  Танхим болон цахим хэлбэрээр зэрэг явагдсан Эрдмийн бага хуралд ХСҮТ-ийн болон хот, хөдөөгийн эмнэлгүүдээс нийт 80 гаруй сувилагч оролцож, 11 аман илтгэл, 4 ханын илтгэлийг сонсон хэлэлцжээ. Тус илтгэлүүдийн 2 нь УНТЭ-ийн, 1 нь Дорноговь аймгийн судлаач сувилагч нараас ирүүлсэн байна.  2022 оны сувилахуйн Эрдмийн бага хурлын илтгэлүүдээс дараах илтгэлүүд шилдгээр тодрон шалгарлаа. 

Аман илтгэлийн төрлийн тэргүүн байранд ХСҮТ-ийн ХМНТ-ийн сувилагч Б.Соёлзул нарын “Мэс заслын өмнөх сэтгэл зүйн байдал мэс заслын дараах үеийн сэтгэл түгшилтийг үнэлэх нь”, дэд байранд ХСҮТ-ийн ЕМЗТ-ийн сувилагч Б.Бадамдолгор нарын “Хэвтэн эмчлүүлэгчдийн ходоодны өмөнгийн талаарх мэдээллийн эх сурвалж, эрэлт хэрэгцээг тодорхойлох судалгаа”, тусгай байранд ХСҮТ-ийн ТЭТ-ийн сувилагч Г.Жамъянтүдэв нарын “Мэс заслын шархтай өвчтөний гэртээ гарах үеийн шархны арчилгааны мэдлэг үнэлэх нь”, ХСҮТ-ийн ТХМЗ-ийн сувилагч Ц.Үүрийнтуяа нарын “ТХ-ний байрлалын хавдартай мэс засал хийлгэсэн эмчлүүлэгчдийн амьдралын чанарыг судлах нь” илтгэлүүд, Ханын илтгэлийн төрөлд ХСҮТ-ийн сувилагч Ч.Цэрэннадмид нарын “Сувилагчдын ажлаас халшрах хам шинжийг харьцуулан судлах” илтгэлүүд тус тус шалгарчээ.