Цагдаагийн ерөнхий газрын Хар тамхитай тэмцэх газраас Гаалийн ерөнхий газрын Зөрчилтэй тэмцэх, аюулгүй байдлын газрын Хар тамхи, мөнгө угаахтай тэмцэх хэлтэс, Тагнуулын ерөнхий газрын чиг үүргийн нэгжтэй хамтран энэ оны 04 дүгээр сарын 19-21-ний өдрүүдэд мансууруулах эм, сэтгэцэд нөлөөт бодисын хууль бус эргэлттэй тэмцэх, урьдчилан сэргийлэх ажлыг эрчимжүүлэх, алба хаагчдыг тухайн чиглэлээр мэргэшүүлэх ажлын хүрээнд Сэлэнгэ аймаг дахь гаалийн газрын Сүхбаатар, Алтанбулаг боомт, Чингисхаан олон улсын нисэх буудал дахь гаалийн газарт ажиллаа. 

Сургалт, урьдчилан сэргийлэх арга хэмжээний хүрээнд мансууруулах эм, сэтгэцэд нөлөөт бодисын хууль бус эргэлтийн олон улсын нөхцөл байдал, чиг хандлага, эрсдэлтэй зам сувгууд, гаалийн хяналт шалгалтыг хэрэгжүүлэхэд анхаарах асуудлууд болон АНУ-ын Хил, гаалийн албаны хяналт шалгалтын туршлага, арга техникийн талаар холбогдох мэдээллийг хүргэсэн юм. 

Энэ үеэр Сүхбаатар, Алтанбулаг боомтод мансууруулах бодис илрүүлэх багаж, албаны эрэлч нохой, зорчигчийн гар тээш болон хүний бие шалгах рентген аппарат ашиглан эрсдэлтэй 5 зорчигчдод хамтарсан хяналт шалгалт хийхэд 6 нэр төрлийн баталгаагүй эм, эмийн зүйлийг Зөрчлийн тухай хуулийн 11.21-р зүйлийн 11 дэх хэсгийг зөрчин улсын хилээр хууль бусаар нэвтрүүлэхийг завдсан зөрчил илэрснийг хуулийн дагуу шалган шийдвэрлэв.