ЦЕГ-ын Урьдчилан сэргийлэх хэлтсийн хүүхдийн эсрэг гэмт хэргээс урьдчилан сэргийлэх хэлтсийн дарга, цагдаагийн дэд хурандаа Д.Будзаан: “Хичээл эхэллээ” арга хэмжээг есдүгээр сарын 1-4-ний өдрүүдэд зохион байгуулна. Энэ хүрээнд цагдаагийн байгууллагаас 5200 орчим алба хаагч сургуулийн орчимд эргүүл хийж, хяналт шалгалт хийн, замын хөдөлгөөний аюулгүй байдлыг хангуулна. Улсын хэмжээнд 885 орчим сургуульд гэмт хэргээс урьдчилан сэргийлэх хичээлийг орно. Мөн зам тээврийн ослоос сэргийлэх хичээл орно. Хичээл эхлэх үеэр цахим орчинд янз бүрийн залилангийн чанартай зарууд явдаг. Үүнтэй холбоотой 14 гэмт хэрэг илрүүлэн, цагдаагийн байгууллагаас шалгалтын ажиллагааг явуулж байна. энэ оны эхний найман сарын байдлаар хүүхэд үйлдсэн гэмт хэрэг улсын хэмжээнд 27 хувиар буурсан. Хүүхэд хохирсон гэмт хэрэг улсын хэмжээнд 6.8 хувиар буурсан үзүүлэлттэй байна. Жил бүрийн 9-10 дугаар сард цагдаагийн байгууллагад хүүхэд хичээл давтуулахтай холбоотойгоор эцэг эх хүүхдүүдийн хооронд зөрчил үүссэн дуудлага мэдээлэл 102 болон 108 утсанд нэмэгддэг. Мөн энэ үеэр халаасны хулгайн гэмт хэрэг нэмэгддэг. Хүүхдүүд халааснаасаа гар утас, эд зүйлс, бэлэн мөнгөө алддаг. Үүнийг ихэвчлэн 20-30 насны тодорхой эрхэлсэн ажилгүй залуус үйлддэг. Цагдаагийн байгууллагаас халаасны хулгайн хоёр бүлгийг илрүүлэн баривчилсан. Сургуулийн орчимд үйлдэгдсэн гэмт хэрэг энэ оны эхний найман сарын байдлаар 169 бүртгэгдсэн. Сургуулийн орчимд гэмт хэрэг үйлдэгдэхээс урьдчилан сэргийлэх ажлыг боловсролын байгууллага хариуцдаг. Иймд гэмт хэрэг ихээр үйлдэгдсэн сургуулиудад зөрчлийг арилгах, заавар зөвлөмж өгсөн. Хоёр сургуулийн захиралд Зөрчлийн хуулиар торгох арга хэмжээ авсан. Сургуулийн орчныг бүрэн камержуулсан байх ёстой. Иймд 557 камерыг нэмж суурилуулсан. Мөн хичээл сургууль орсон үед хүүхдүүд төөрсөн гэх дуудлага мэдээлэл нэмэгддэг. Эцэг эхчүүд  гараас гарт хөтөлбөрийг хэрэгжүүлэхийг уриалж байна. ахлах ангийн хүүхдүүдийг орон нутагт хичээлд нь мотоцикл унуулаад явуулчихдаг. Насанд хүрээгүй, жолоодох эрхийн үнэмлэхгүй ангийнхаа хүүхдийг, найз нөхдөө сундалж яваад зам тээврийн осолд өртөх, амь насаа алдах тохиолдлууд нэмэгддэг. Үүн дээр цагдаагийн байгууллагаас хяналт шалгалт хийнэ. Эцэг эхчүүд ч үүн дээр анхаарал тавьж хамтран ажиллахыг уриалж байна.