АДМИН
Төлбөрийн чадваргүйн улмаас санхүүгийн эрсдэлд орсон, татан буугдсан банканд байршиж байсан тусгай зориулалтын сан, төрийн байгууллага, төрийн өмчит хуулийн этгээдийн хөрөнгийг буцаан төвлөрүүлж, төрийг хохиролгүй болгох ажлыг шуурхай зохион байгуулах үүрэг бүхий Ажлын хэсгийг Монгол Улсын Ерөнхий сайдын 2025 оны 8 дугаар сарын 22-ны өдрийн 75 дугаар захирамжаар байгуулсан.
Уг ажлын хэсгийг Төрийн өмчийн бодлого, зохицуулалтын газрын дарга Б.Цэнгэлээр ахлуулж, Шүүхийн шийдвэр гүйцэтгэх ерөнхий газар, Авлигатай тэмцэх газар, Сангийн яам, Боловсролын яам, Монголбанк, Хөгжлийн банк, Нийгмийн даатгалын ерөнхий газар, Эрүүл мэндийн даатгалын ерөнхий газар, Хөдөлмөр, халамж үйлчилгээний ерөнхий газар, Капитал банкны эрх хүлээн авагч зэрэг бүрэлдэхүүнтэй байгуулсан.
Өнөөдөр буюу 2025.08.29-ний өдөр ажлын хэсгийнхэн Хөгжлийн банкны зээлийн өр төлбөрт хураагдсан боловч худалдан борлогдохгүй удаж байгаа үл хөдлөх хөрөнгүүдийг газар дээр нь очиж танилцаж, асуудлыг шийдэх гарц гаргалгааг тал бүрээс харилцан ярилцлаа.
Тухайлбал Хан-Уул дүүргийн 21-р хороонд байрлах “Шинэ яармаг” хороолол, дахь объектууд, “Нүхт”-ийн аман дахь амины орон сууц, Хан-Уул дүүргийн 11-р хороонд байрлах “Гантиг Вилла” төслийн талбайд очиж нөхцөл байдалтай нь танилцаж ажиллалаа.
Энэ үеэр ажлын хэсэг хэлэлцэж цэцэрлэгийн зориулалтаар ашиглах боломжтой барилгыг гүйцээн барьж ашиглалтад оруулахад шаардагдах зардлын тооцоог гаргаж санхүүжилтийн асуудлыг шийдвэрлүүлэх орон сууцны зориулалттай объектуудыг нээлттэй дуудлага худалдаагаар борлуулах боломжтой гэж үзээд ирэх 9 дүгээр сарын 05-ны өдөр дахин хуралдахаар тогтов.
|
Нийгэм
