Хөвсгөл аймгийн Тариалан суманд 2 настай хүү сураггүй алга болоод 6 өдөр болж байна. Хүүг эрэн хайх ажиллагаа үргэлжилж байгаа юм. Эрэн хайх ажиллагаанд оролцож буй Хөвсгөл аймгийн Тариалан сумын Засаг даргын тамгын газрын ажилтнаас тодрууллаа.
-Өнөөдөр бороо үргэлжлэн орж байна гэсэн. Эрлийн нөхцөл байдал ямар байна вэ?
-Үүрийн 04:00 цагаас хойш тасралтгүй бороо орж байна. Нөхцөл байдал хүндхэн байна. Гэсэн ч эрэн хайх, аврах ажиллагаа маань үргэлжилсээр байна.
-Эрэлд сайн дураараа оролцсон зарим хүмүүс цахим сүлжээнд сэтгэгдлээ бичиж байна. Чоно ульсан, харагдсан гэх мэтээр. Танд ажиглагдсан зүйл бий юу?
-Энэ бүс нутаг угаасаа чоно элбэгтэй. Ой, тайгын бүс шүү дээ. Эрэл эхэлснээс хойш хэд хэдэн эрэн хайх ажиллагааны багийнханд чоно харагдсан. Улих нь сонсогдсон.
-Ойрхон оршуулгын газар бий гэж зарим хүмүүс бичиж?
-Тийм тийм. Дээр үед хүн тавьдаг байсан газар бий.
-Түүгээр нь тас гэх мэт том шувуу элбэгтэй гэсэн үү?
-Тийм бас байдаг.
-Та хүүгийн аав, ээжтэй уулзсан уу. Сэтгэл санаа нь хэр байгаа вэ?
-Үр хүүхдээ алдчихсан улсууд хүндхэн л байна. Ямар ч байсан итгэл алдрахгүй хайж л байна.
-Шөнө дулаан мэдрэгч дрон ашиглаж байгаа гэсэн үү?
-Эрлийн ажиллагаа эхэлснээс хойш ердөө тасраагүй. Шөнө дулаан мэдрэгч дроноор, өдөр нь иргэд, мэргэжлийн анги нэгтгэлийнхэн хайсаар байгаа.
-Өнөөдрийн байдлаар хэчнээн хүн эрлийн ажиллагаанд оролцож байна вэ?
-Бид уулын нэлээд өндөрлөг хэсэгт гарчихсан, бороо ихтэй байна. Доош бууж өнөөдрийн ажиллагааны дүн мэдээллээ авч амжаагүй л явна.
|
Нийгэм
