АДМИН
Филиппиний өмнөд хэсэгт Женерал Сантос хотын эрэг дагуу /2026.06.08/ 7.8 магнитудын хүчтэй газар хөдлөлт болсон. Газар хөдлөлтийн улмаас эрэг дагуу нэг метрийн цунамигийн давлагаа үүсэж, тог цахилгаан тасрав.
Газар хөдлөлтийн улмаас ойролцоогоор 32 хүн амь насаа алдаж, 200 гаруй хүн бэртэж гэмтээд байгаа бөгөөд ойролцоох эрэг дагуу 1 метр өндөр цунами үүсгэсэн гэж албаныхан мэдээллээ.
Тус хотын гамшгийн удирдлагын газрын дарга Арлен Холлерогийн мэдээлснээр эргийн тосгодын оршин суугчдыг нүүлгэн шилжүүлж байгаа бөгөөд гүүрэнд ан цав үүсэж, томоохон шашны дурсгалт байгууламж нурсан байна.
Женерал Сантос нь 700 мянга гаруй хүн амтай бөгөөд өмнөд бүсийн худалдааны төв болсон хот. Тус хотын эдийн засаг туна үйлдвэрлэл дээр тогтдог аж.
Дэлхийн хамгийн гамшигт өртөмтгий орнуудын нэг болох Филиппин улс нь Номхон далайн галын цагариг дээр байрладаг. Иймд, газар хөдлөлт, галт уулын дэлбэрэлт ойр ойрхон болдог онцлогтой. Мөн жил бүр 20 орчим удаагийн хар салхи, халуун орны шуурганд өртдөг байна.
|
Нийгэм
