Б.БИЛЭГСАЙХАН
Улсын онцгой комиссын даргын 2026 оны 06 дугаар сарын 08-ны өдрийн 5 дугаар тушаалаар байгуулагдсан ажлын хэсэг Монгол Улсын Ерөнхий сайдын 2026 оны 10 дугаар албан даалгавар, Улсын онцгой комиссын 2026 оны 01 дүгээр хуралдааны тэмдэглэлийн хэрэгжилтийг хангах хүрээнд Өмнөговь аймагт уул уурхайн салбарын төлөвлөгөөт бус хамтарсан хяналт шалгалтыг зохион байгуулан ажиллаж байна.
Байгаль орчин, уур амьсгалын өөрчлөлтийн яам, Аж үйлдвэр, эрдэс баялгийн яам, Гэр бүл, хөдөлмөр, нийгмийн хамгааллын яам, Стандарт, хэмжил зүйн газар, Ашигт малтмал, газрын тосны газар, Экологийн цагдаагийн алба болон холбогдох байгууллагын төлөөллөөс бүрдсэн 7 чиглэлийн хяналтын баг Өмнөговь аймгийн Гурвантэс, Ноён, Баяндалай, Сэврэй сумдад ажиллаж байна.
Хяналт шалгалтад ашиглалтын тусгай зөвшөөрөл эзэмшигч 11, хайгуулын тусгай зөвшөөрөл эзэмшигч 2, туслан гүйцэтгэгч 18, тэсэлгээний хэрэгслийн үйлдвэрлэлийн үйл ажиллагаа эрхлэгч 3, хууль бус ашиглалтын 1, тусгай хамгаалалттай газар нутагт хууль бусаар алт олборлосон эзэнгүй орхигдсон 2 талбай зэрэг нийт 37 объектыг хамруулжээ.
Мөн Гурвантэс, Ноён, Баяндалай сумдын нутагт үйл ажиллагаа явуулж буй ашиглалтын 5, хайгуулын 1, нийт 6 тусгай зөвшөөрөл эзэмшигчийн 270 хайгуулын цооногийг шалгахад 143 цооногийг холбогдох журмын дагуу нөхөн сэргээсэн бол 127 цооногт нөхөн сэргээлт хийгдээгүй, шав тавьж битүүмжлээгүй, тэмдэг тэмдэглэгээ байрлуулаагүй зөрчил илэрсэн байна. Үүнээс 126 цооног нь “Энх тунх орчлон” ХХК-ийн уурхайн бүсэд хамаарч байгаа аж.
Хяналт шалгалтын явцад давхардсан тоогоор нийт 432 зөрчил, дутагдал илэрсний 49 нь байгаль орчны, 68 нь геологи, уул уурхай, газрын тосны, 212 нь хөдөлмөрийн аюулгүй байдал, эрүүл ахуйн, 103 нь стандарт, хэмжил зүйн чиглэлийн зөрчил байна.
Илэрсэн зөрчил, дутагдалтай холбогдуулан 32 аж ахуйн нэгжид нийт 389 заалт бүхий 44 хугацаатай албан шаардлага хүргүүлж, 3 аж ахуйн нэгжийн үйл ажиллагааг улсын байцаагчийн актаар түр зогсоожээ. Түүнчлэн 30 зөрчлийг прокурорын нэгдсэн санд бүртгүүлж, 8 зөрчлийг хялбаршуулсан журмаар шийдвэрлэн, 2 аж ахуйн нэгжид зөрчлийн хэрэг нээн шалгаж байна. Мөн 2 асуудлыг харьяаллын дагуу шилжүүлж, 4 аж ахуйн нэгжийн үйл ажиллагааг прокурорын зөвшөөрлөөр хэсэгчлэн түр зогсоосон байна.
Үүнээс гадна гэмт хэргийн шинжтэй 3 үйлдлийг илрүүлэн материалжуулж, холбогдох журмын дагуу шалгалтын ажиллагааг үргэлжлүүлж байгаа бөгөөд нөхөн сэргээлт хийгээгүй хайгуулын цооногуудыг стандартын дагуу нөхөн сэргээж, аюулгүй байдлыг хангах арга хэмжээг яаралтай авах шаардлагыг холбогдох аж ахуйн нэгжүүдэд хүргүүлэн ажиллаж байна.
|
Нийгэм
