Ойрын өдрүүдэд манай орны зүүн хагас нутгаар хур тунадас үргэлжлэн орж, уулархаг бүсээр нойтон цас орж сэрүүхэн байх төлөвтэй байна.

Хур тунадасны тухайд энэ сарын 19-нд нутгийн зүүн хагаст бороо орох бол, 20-нд төвийн аймгуудын нутгийн зарим газар, говийн аймгуудын нутгийн зүүн хойд хэсэг болон зүүн аймгуудын ихэнх нутгийг хамарна. Мөн 21-нд төв болон зүүн аймгуудын нутгийн зарим газраар, 22-нд баруун аймгуудын нутгийн баруун хэсэг, төв болон зүүн аймгуудын зарим газар, говийн аймгуудын зүүн хойд хэсгээр бороо орно. Түүнчлэн 23-нд баруун аймгуудын нутгийн зарим газар, төвийн аймгуудын нутгийн зүүн хэсэг, зүүн аймгуудын ихэнх нутгаар бороо, дуу цахилгаантай аадар бороо орох бөгөөд уулаараа нойтон цас орохыг синоптикчид анхаарууллаа. Үргэлжлээд 24-нд нутгийн зарим газраар, 25-нд баруун аймгуудын нутгийн зарим газар, төвийн аймгуудын нутгийн баруун хэсгээр тус тус бороо орох төлөв гарчээ.

Салхины хувьд ихэнх хугацаанд говь, тал, хээрийн нутгаар секундэд 12-14 метр хүрч ширүүсэх бөгөөд бороо орохын өмнө салхи түр зуур улам ширүүсэх аж.

Агаарын температурын хувьд 19-нөөс 22-ныг хүртэл нутгийн зүүн хагаст сэрүүсэх бөгөөд Монгол-Алтай, Дархадын хотгор, Хүрэнбэлчир орчим, Хангай, Хөвсгөл, Хэнтийн уулархаг нутаг, Идэр, Тэс, Туул, Тэрэлж голын хөндийгөөр шөнөдөө -3 градусаас +2 градус, өдөртөө +7-оос +12 градус дулаан байна. Харин говийн бүс нутгийн баруун өмнөд хэсгээр шөнөдөө +11-ээс +16 градус, өдөртөө +25-аас +30 градус дулаан байх бол говийн бүс нутгийн зүүн хэсгээр шөнөдөө +7-оос +12 градус, өдөртөө +21-ээс +26 градус, бусад нутгаар шөнөдөө +1-ээс +6 градус, өдөртөө +10-аас +15 градус дулаан байх юм байна.

Энэ сарын 23-наас эхлэн ихэнх нутгаар дулаарч Монгол-Алтай, Дархадын хотгор, Хүрэнбэлчир орчим, Хангай, Хөвсгөл, Хэнтийн уулархаг нутаг болон голуудын хөндийгөөр шөнөдөө +4-өөс +9 градус, өдөртөө +18-аас +23 градус дулаан болно. Мөн говийн бүс нутгийн баруун өмнөд хэсгээр шөнөдөө +14-өөс +19 градус, өдөртөө +29-өөс +34 градус хүрч халах бол, говийн бүс нутгийн зүүн хэсгээр шөнөдөө +10-аас +15 градус, өдөртөө +24-өөс +29 градус, бусад нутгаар шөнөдөө +5-аас +10 градус, өдөртөө +21-ээс +26 градус дулаан байна.

Улаанбаатар хот орчмын 10 хоногийн цаг агаарын урьдчилсан төлвөөр энэ сарын 20, 21, 22-нд бага зэргийн бороо, уулаараа нойтон цас орно. Салхи ихэнх хугацаанд их төлөв зүүнээс секундэд 6-11 метр хурдтай байх бөгөөд борооны өмнө салхи түр зуур ширүүснэ. Нийслэл хотод 19-нөөс 22-ны өдрүүдэд сэрүүхэн байх бөгөөд шөнөдөө -1 градусаас +4 градус, өдөртөө +9-өөс +14 градус дулаан байна. Харин 23-ны өдрөөс дулаарч шөнөдөө +6-аас +11 градус, өдөртөө +21-ээс +26 градус дулаан байх төлөвтэй байна.