Оюу толгойн хэлэлцээрээр яг юу өөрчлөгдөв? Энгийнээр тайлбарлая

Оюу толгойг барихын тулд их хэмжээний мөнгө зээлсэн байдаг. Зээл авсан учраас тэр мөнгөндөө жил бүр хүү төлдөг.

Энэ удаа Засгийн газар Рио Тинтотой хэлэлцэж, хамгийн том зээлийн хүүг бууруулж чадлаа.

Яг юу өөрчлөгдсөн бэ?

1. Зээлийн хүү багаслаа

Өмнө нь энэ зээлийн хүү 10.4 хувь байсан бол одоо 7.9 хувь болж буурсан.

Энгийнээр хэлбэл, өмнөхөөсөө бага мөнгө хүү болгон төлнө гэсэн үг.

2. Илүү их мөнгө хэмнэнэ

Хүү багассанаар ирэх жилүүдэд нийтдээ 6.2 тэрбум ам.долларын зардал хэмнэх тооцоо гарчээ.

Тэр мөнгөнөөс Монголын талд ногдох ашиг 2.5 тэрбум ам.доллараар нэмэгдэх боломжтой болсон байна.

3. Өдөр бүр төлдөг хүү ч багасна

Өмнө нь өдөр бүр ойролцоогоор 13.6 тэрбум төгрөгийн хүү төлдөг байсан.

Харин одоо энэ нь 10.2 тэрбум төгрөг болж, ойролцоогоор 25 хувиар буурна.

4. Хүүгээ ойр ойрхон дахин хэлэлцдэг боллоо

Өмнө нь зээлийн хүүг 7 жилд нэг удаа л өөрчлөх боломжтой байсан.

Харин одоо 3 жил тутам дахин ярилцаж, зах зээлийн нөхцөлд тааруулан бууруулах боломжтой болжээ.

5. Ноогдол ашгийг илүү эрт авах боломж бүрдэв

Хэрэв энэ хэлэлцээр хийгдээгүй бол Монгол Улс 2039 онд анхны ногдол ашгаа авах байв.

Харин хэлэлцээний үр дүнд 2026 онд ногдол ашиг авах зарчмын тохиролцоонд хүрсэн байна. Яг хэдий хэмжээний ногдол ашиг авахыг дараагийн хэлэлцээгээр эцэслэн шийднэ.

Үүнийг хамгийн энгийнээр ойлговол...

Та банкнаас мөнгө зээлсэн гэж төсөөлье.

• Өмнө нь өндөр хүү төлдөг байсан.
• Банктай ярилцаад хүүгээ багасгаж чадлаа.
• Ингэснээр сар бүр бага мөнгө төлнө.
• Илүү их мөнгө өөртөө үлдэнэ.
• Дараа нь дахин хүүгээ бууруулах талаар ойр ойрхон ярилцах боломжтой боллоо.

Оюу толгойн хэлэлцээрийн гол утга нь үүнтэй адил. Хүүг бууруулснаар Монголын талын зардал багасч, цаашид авах өгөөж нэмэгдэх боломж бүрдэж, ноогдол ашгийг илүү эрт авах нөхцөл бүрдсэн гэж Засгийн газар үзэж байна.